Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NIVÎSAR

Kurd xurt dibin – Tirkiye behsa parastina "nîzama dewletê" dike


	» Tirk behsa şidetê li dijî kurdan dikin

DIYARBEKIR, 27/10 2014 — Tirkiye li Kurdistana Sûriyeyê, li bakurê Kurdistanê û heta li başûrê Kurdistanê jî rûbirûya rola giring ya miletê kurd di siyaseta cîhanê de bûye û nizane çi ji Kurdistanê bike. Hemî elamet nîşan didin ko Tirkiyeyê siyaseta şidetê ji xwe re bijartiye.

Serokkomarê Tirkiyeyê Recep Tayyîp Erdogan heroj derdikeve û dibêje ew fêm nake çima dinya hewqasê serê xwe bi Kobanê ve diêşîne. Li gor rojnameya Yenî Şafakê serokwezîr Ahmet Davutoglu jî duhî bi heman uslubê got:

— Dema ko Humus du sal û nîvan di bin muhasereyê de bû û insan dihatin kuştin hêzên nêvneteweyî li kû bûn. Dema ko Daişê turkmen qetil dikirin hon li kû bûn? Sala borî dema ko PYD-ê kurdên li Hesekê derbider kirin û rêkirin Tirkiyeyê hon li kû bûn.

Yalçin Akdoganê arîkarê Ahmet Davutoglu jî duhî behsa kuştina sê eskerên tirk li Geverê kir û got:

— Wisa xuya dike ko prosesa çareseriyê agir berdaya delinga wan [ya PKK-ê]. Rêxistin di rewşa panîkatakê de ye. Ji ber ko hukumet pir bi qerardarî dixwaze bigehe netîceyê niho provokator ketine dewreyê û lêdixebitin ko lehîstokê têkbidin. Lê belê bila bizanin ko em pir baş dizanin ka dê çawa hesabî ji wan provokatoran û kesên ko benê wan di destê xwe de radigirin bipirsin û dewlet heyfa xwe li cem kesî nahêle.

Paşê jî Yalçin Akdogan got ji bo dewleta Tirkiyeyê ya herî giring parastina "nîzama dewletê" ye û got:

— Bingehê herî esasî ew e ko em nîzama dewletê saxlem bikin. Heta ko ev çênebe em hîç tiştekî bi hîç kesekî re munaqeşe nakin. Ji bo pêkanîna nîzama dewletê û ewlekariya wê çi pêwist be ew dê bêt kirin. Tiştên ko diqewimin bila tikesî netirsîne û hîç kesekî bêhêvî neke. Tirkiye ne dewleteka wisa ye ko teslîmî terorê û şidetê bibe.

Numan Kurtulmuşê arîkarê Ahmet Davutoglu jî behsa rewşa xeternak ya Tirkiyeyê kir û got:

— Em prosesa çareseriyê berî hertiştî wekî proseseka insanî dibînin. Pêwist bû ko li Tirkiyeyê ev teror hemî nemîne û sîleh hatibûna binax kirin. Em ji bo vê ketin ser rê. Hinek dixwazin ko em paşde vegerin. Di vê ava pêldijwar de paşdeveger ji çûna aliyê dî xetertir e. Digel hemî zehmetiyan em dê derbasî aliyê dî bibin û bigihîn selametiyê.

Siyasetmedarê kurd Mîr Dengîr Mehmet Firat ko yek ji damezrênerên AKP-ê bû 26-ê vê mehê ji rojnameya Ozgur Gundemê re got dewlet li siyaseta salên 1990-ê vegeriyaye û hukûmeta AKP-ê dixwaze probleman bi rêya şidetê çareser bike. Mîr Dengîr Mehmet Firat got li bakurê Kurdistanê serxwebûn jî daxil divêt kurd bikarin bi awayekê wekhev û azad siyasetê bikin û got:

— Dema ko kurd dibêjin em dixwazin bi destê xwe hukmî li xwe bikin tirk dibêjin "ma we zêdetir çi divêt, hon dikarin bibin serokkomar jî". Dema ko em behsa desthilatê dikin ew dibêjin ma we çi dî divêt hon dikarin bibin serokê partiya li ser desthilatê jî. Gotinên wiha gelek caran ji min re gotin. Min jî hertim ji wan re got sextekariyê nekin. Dema ko ez bi nasnameya xwe wekî kurd bikarim bibim serokkomar û wekî kurd bibim parlamenter hingê em dibin wekhev. Lê belê dema ko ez nasnameya xwe veşêrim û bibim parlamenter yan wezîr hîç menayeka wê nîne. Yên ko bi vî awayî dixwazin me bixapînin li gor min sextekar in.

Mirov ji kîjan aliyî ve lê temaşa bike Tirkiye di rewşeka xirab de ye û nizane çawa miameleyê bi doza miletê kurd re bike.

Tirkan dua dikir ko Kobanê zû bikeve destê Daişê de û Xwedê duaya wan qebûl nekir. Tirkan dixwest doza miletê kurd li Kurdistana Sûriyeyê wekî li bakur bi hêceta PYD-ê terorîze bikin û wisa li cîhanê bidin qebûl kirin ew jî nebû. Îro başûrê Kurdistanê, Emerîka, Ewropa û cîhan piştgiriya Kurdistana Sûriyeyê dikin û Kobanê bûye sembola berxwedaneka neteweyî ya miletê kurd.

Heger PKK jî hinekê aqilê xwe bîne serê xwe û guhê xwe bide desthilata başûrê Kurdistanê şansê wê jî heye ko piştgiriyeka nêvdewletî bistîne û di pratîkê de mohra "terorîzmê" ji ser xwe bide rakirin.

Piştgiriya serokê Kurdistanê Mesûd Barzanî û Emerîkayê ya ji bo Kobanê wisa kir ko li bakurê Kurdistanê û Tirkiyeyê kurd hêdî hêdî bi çavekê pozîtîv li Emerîkayê û welatên "emperyalîst" temaşa dikin û ji aliyê ruhî ve ji tirkan dûr dikevin.

Konjunktura cîhanê ji bo bextê kurdan pozîtîv e û ya mayî di destê kurdan bi xwe de ye.

-----------------------------------

Nivîskar: LEWENDÊ BOTÎ
Weşandin: 2014-10-27
Xwendin: 7240