Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

LÎTERATÛR

[ KURTEÇÎROK ]

[ PARÇEROMAN ]

[ REXNE ]

[ HELBEST ]

Dereng lê ne bêaheng

SWÊD, 3/4 2006 — Belê romana Firat Cewerî ya bi navê “Payiza Dereng” li gorî yekî ko ji mêj ve bi karê nivîsîn û edebîyatê ve mijûl e re bi derengî be jî payiza çûyî derket. Firat Cewerî çawa ko pirrên xwendevanan jî di zanin ji sala 1980yî ve li Swêdê dimîne û hima çi bigir ji destpêka hatina xwe ya Swêdê ve jî dest bi karê helbest û çîroknivîsînê kirîye, lê hê bêhtir ew bi derxistina kovara Nûdemê (ji 1992yan ve) û piştre jî bi nûveweşana kovara Hawarê hatîye nasîn.

Herweha di vê navê de wî gelek berhemên cihê yên edebîyata cîhanê wergerandine zimanê kurdî û bi xwe jî gelek berhemên weke Kevoka Spî, Pêlîn Derya Reş, Kultur, Huner, Edebîyat û gelekî din nivîsîne. Wî sala 2003yan de jî berhevoka Antolojîya çîrokên kurdî di nav weşanên Nûdemê de derxist.

Di Payiza Dereng de mirov bi giştî sê xalên sereke yên ko di sê pêlên jîyanê yên cuda - belkî jî nepayî - de hatine pê, dibîne. Roman bi xwe ji pêla navîn ko destpêka zivirîna ji penaberîyê ber bi welatî ve ye, dest pê dike û jiyana refek ji nifşê hevdemê xwe ya di hinek waran de têkçûyî, ji hinek hêlan ve nîvserkeftî lê digel wê jî di atmosfereke bêserûber û hêvîşikestî bi hinek serpêhatîyên mişextîyê û hisên tevîhev û ne zahf zelal rave dike û di nav van dilînîyên têkel de lehengê xwe Ferda ber bi welatî ve verêdike.

Vêca gava lehengê romanê digihê welêt û cudahî, xirecir û gelşên dijraber ko ne li hêvîyê bû dibîne careke din serobino dibe û radibe van hisên xwe bi nameyan bi hevrêyê xwe yê kevn û dost xwe yê niha Ferîd re parve dike ko ev jî pêla romanê ya sêyemîn e. Her weha bi van nameyan ew tevlîhevî û çewtîyên jiyanê yên li gorî wî dilerçêq û libendênebûyî digel dijminî û bextreşîyên ko hevrê û destbirayên hev yên kevn li hev dikirin û ew matel dihiştin ji dostê xwe re dinivîse û her di wan nameyên xwe de behsa jiyana xwe û wan ya zarokî û xortanî ya pêkve jî dike û destpêka bîrewewerîya neteweyî ko ew ber bi rêkxistin û şoreşgeriya salên 70yî ve biribûn tîne pêş çavên xwendevanan ko ev jî pêla yekemîn ya romanê ye.

Nivîskarî xwestîye tevger û libta salên heftêyî yên wî nifşê serdema xwe ji alîyê neteweyî, gelêrî û rêxistinî ve digel tengî û tahlîyên ko piştre pê re rûbirû mabûn, bêgavîya wan ya revê, jîyana macirîyê û bi gelemperî jiberhevçûna wan di penaberîyê de pêşkêşî xwendevanan bi giştî û bi taybetî jî nesla nû bike.

Her weha nivîskar rewşa jiyana hersê peryodan ko di dem û cihên cuda û li gorî şert û mercên xweser çêbûne de kêm zêde nîşan dide û bi zimanekî herek î hêsa di fersendên cihê cihê de pêşkêş dike. Bûyerên romanê bi gelemperî di navbera Swêd û Kurdistanê de diqewimin lê hinek bûyer jî li hinek bajarên Turkîye û Sûrîyeyê çêdibin. Ziman bi hêsanî û xweş hatîye bikaranîn lê formê romanê carna ji devê kesê duyemîn û carna jî ji yê yekemîn tê gotin, heya “gotina” dawî jî carna mirov dibê qey nivîskar bi xwe lehengê romanê ye lê carna jî yekî duyemîn derdikeve pêş û dibe lehengê wê.

Li gorî ko ceribandina pêşî ye bi ya min nivîskar bi serketî ye û mesaja xwe jî xweş gihandîye xwendevanan lê ew li vê derê naqede û ew lehengê xwe di nav bûyeran de wendabûyî û di bin lêgerênekê de dihîle.

---
Payiza Dereng, Firat Cewerî, Nûdem, 2005

-----------------------------------

Nivîskar: EMÎN NAROZÎ
Weşandin: 2006-04-03
Xwendin: 6446