Nefel

[ PÊNCŞEM, 2024-04-25 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Mesûd Barzanî PKK nehişt û daxwazên siyasî ji bo bakurê Kurdistanê dike

STOCKHOLM, 29/10 2007 — Derdê serokê Kurdistanê Mesûd Barzanî ne nehiştina gerîlayên Partiya Karkerên Kurdistanê ye li başûrê Kurdistanê. Derdê Mesûd Barzanî ne wekî Leyla Zanayê cih û mekanê rêberê PKK-ê Abdullah Ocalanî ye jî. Mesûd Barzanî stratejiyeka nû daye ber xwe û armanca wî ew e ko miletê kurd li bakurê Kurdistanê mafên neteweyî û siyasî bi dest bixe û doza neteweya kurd li bakur bi awayekê siyasî bêt çareser kirin.

Tirk behsa PKK-ê dikin û Mesûd Barzanî behsa çareseriya siyasî ya doza miletê kurd dike. Tirk behsa teslîmkirina rêberên PKK-ê yên li başûr dikin û Mesûd Barzanî dibêje ew yek benderihî tenê jî teslîmî ti dewletên cîran nake. Tirk dibêjin Mesûd Barzanî piştgirê PKK-ê û “terorê” ye û Mesûd Barzanî dibêje ew arîkariya PKK-ê nake lê belê heger Tirkiye li rêyeka siyasî û aştiyane ji bo doza miletê kurd li bakur bigere ew dê arîkariya Tirkiyeyê bike.

Heger we ferq kiribe serokê Kurdistanê behsa çareseriyeka eskerî ji problema eskerî ya gerîlayên PKK-ê re nake û dibêje PKK encameka doza siyasî ya miletê kurd e û dibêje ko ew bi xwe li her parçeya Kurdistanê piştgiriya doza miletê kurd dike.

Di hevpeyvîna xwe ya herî dawiyê de digel El-Cezîreyê duhî Mesûd Barzanî got ew nabêje ko bila statûya miletê kurd li bakur bi sedê sed wekî li başûrê Kurdistanê bêt çarser kirin, lê belê got tecribeya başûrê Kurdistanê nimûneyeka baş e û divêt li herçar parçeyên Kurdistanê istifade jê bêt dîtin.

Yanî çi? Yanî Mesûd Barzanî doza miletê kurd li bakurê Kurdistanê ji qalibê PKK-ê û mohra “terorê” ya ko li PKK-ê ketiye derdixe û dibêje PKK ne “terorîst” e û di heman demê de diyar dike ko PKK-ya Abdullah Ocalanî û generalên tirkan nemaye û hêdî ew ti hesaban ji wê PKK-yê re jî nake.

Yanî Mesûd Barzanî lêdixebite ko rêberiya miletê kurd li bakurê Kurdistanê ji destê Abdullah Ocalanê hevkar û zelamê tirkan derxe û ew bi xwe rêberiya hemî miletê kurd bike. Ev sirreka aşkera ya Mesûd Barzanî ye lê belê di van demên dawiyê de wî destpê kiriye û aşkera wê dibêje jî.

Serokê Kurdistanê Mesûd Barzanî cih li tirkan teng kiriye û rêberên dewleta tirkan çi siyasî bin û çi eskerî bin rê li ber xwe şaş kirine û nizanin çi bikin.

Tirkan ji bo ko ji parlamentoya xwe destûrê ji bo rêkirina eskerî bo başûrê Kurdistanê derxin li Bêşebabê 12 kurdên sivîl kuştin û gotin PKK-ê ew kuştine. Tirkan her piştî hingê li devera Gabarê ya Şirnexê 12 eskerên xwe kuştin yan jî kirin qurban û avêtin pêşiya PKK-ê da bên kuştin. Herdu bûyer jî bi plana tirkan hatin kirin.

Lê belê 21-ê vê mehê piştî derxistina tezkereyê tirkan li hindava Oremarê re xwest derbasî başûrê Kurdistanê bibin û di wê teşebisa derbasbûnê de 12 eskerên wan hatin kuştin, 16 birîndar bûn û 8 jî hatin êxsîr kirin. Tirkan got gerîlayên PKK-ê êrişî bingehên eskerî yên wan kirine. Ew bi temamî derew e û tirkan xwest xwe biceribînin û derbasî başûrê Kurdistanê bibin. Çi bû li wêderê bû û PKK-ya ne ya tirkan derbeka kujende li tirkan da û piştî wê rojê tirk dîn û har bûne û nizanin çi ji xwe bikin.

Baş lê temaşa bikin. PKK-ya Abdullah Ocalanî nemaye. PKK-ya Abdullah Ocalanî ti program û daxwazên siyasî nînin û nake. Lê belê serokê Kurdistanê ji bo bakurê Kurdistanê daxwazên siyasî dike û dibêje PKK encameka doza miletê kurd e û divêt Tirkiye vê fêm bike. Divêt Tirkiye ne tenê vê fêm bike û herwiha divêt Tirkiye ji bo çarserkirina doza miletê kurd li bakur bi Mesûd Barzanî û hikûmeta başûrê Kurdistanê re rûne.

Mesûd Barzanî vê aşkera dibêje lê belê hêjî hinek kurdên bakur ev stratejiya nû ya Mesûd Barzanî fêm nekirine û heta piraniya rêberên PKK-ê bi xwe jî fêm nekirine. Murat Karayilanî dibe ko heta dereceyekê ev fêm kiribe lê belê nemaze DTP, Ahmet Turk û hevalên wî hêjî behsa “otonomiya demokratîk” ya Abdullah Ocalanî dikin û li pey safsatayên tirkan û Abdullah Ocalanî dikevin.

Serokê Kurdistanê Mesûd Barzanî misqalekî ji Tirkiyeyê û tehdîdên wê natirse û ji rêberên tirkan re dibêje kerem bikin em li ser maseya diyalogê rûnin û doza miletê kurd baxivin.

Serokwezîrê tirkan Recep Tayyip Erdogan û serokerkanê wan Yaşar Buyukanit behsa ka dê berî serdana Erdoganî ya Emerîkayê û hevdîtina digel serokê emerîkî George Bushî bikevin başûrê Kurdistanê yan piştî wê bikevinê dikin û tu dibêjî qey bi rastî dê bikevinê lê belê tenê diyarkirina wextî maye.

Yan tirk dê bi operasyonên berteng li hinek niqteyan li ser tixûbî hinek cihên PKK-ê bi balafirên şerî û topan bombebaran bikin û bibêjin vaye wan karê xwe kir û ji problema dagîrkirina başûrê Kurdistanê xelas bibin.

Yan jî tirk bi rastî wekî ko ew dibêjin dê başûrê Kurdistanê û serokê Kurdistanê Mesûd Barzanî ji xwe re bikin hedef û bizmarê pêşiyê û dawiyê li tabûta Komara Tirkiyeyê bidin û hingê dê diyar bibe ka ordiya “qehreman” ya tirkan û “dewlet û miletê tirk yê parçenebar” çawa ji hev parçe dibe û tarûmar dibe.

***

Têbînî: Dema ko ez dibêjim "Mesûd Barzanî PKK nehişt" mebesta min ne ew e ko rêxistina PKK-ê nema. Mebesta min ew e ko Mesûd Barzanî ji PKK-ê re mîsyoneka siyasî nehişt û daxwazên ko diviya PKK-ê ji Tirkiyeyê bikira ew dike û xwedîtiyê li doza miletê kurd li bakurê Kurdistanê dike.

-----------------------------------

Nivîskar: ARIF ZÊREVAN
Weşandin: 2007-10-29
Xwendin: 6349