Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Angaşta desteserkirina Murat Karayilan û pirsgirêka kurd

CIZÎRA BOTAN, 16/8 2011 — Angaşta ko fermandarê PKK-ê Murat Karayilan ji hêla hêzên Komara Îslamî ya Îranê ve hatiye desteser kirin maweya du rojan rojeve Tirkiyayê mijûl kir. Paşê jî aşkere bû ko tu esl û feslê vê nûçeyê nîne û ji binî ve derew e.

Lê ya balkêş ew e ko ew nûçe hêj tam zelal nebûyî, hêj ji aliyê jêderên serbixwe ve nehatî piştrast kirin û ser de jî ji aliyê ROJ-Tv-ê ve dihate derewandin jî dîsa ew nûçeya bêbinyat bû sedem ko hinek kes di malên xwe de kêf û şahînetê bikin.

Fermandarê PKK-ê hatiye girtin an nehatiye girtin, wê bê girtin an nayê girtin, wê bê kuştin an wê bi mirineke normal bimire ev li aliyekê, ez dixwazim hewl bidim ko balê bikişînim ser hin aliyên din yê vê bûyerê:

Serê pêşî çi rayedarên dewletê bin çi jî mensûbên çapemeniyê yên di beralîkirina raya giştî de erkedar bin, ew qas ji nêrîna biaqil û ji besîretê dûr in û ew qas di bin bandora hestên xwe de tevdigerin ko hêj nizanin girtina fermandarekî ne ewqas hêsanî ye.

Wek tê zanîn PKK ev bi dehan sal e di hemberî artêşa herî bihêz ya Rojhilata Navîn de şerî dike. Çendîn caran dewleta Tirkiyeyê bi hêzên xwe yên xurt êrîşî biryargeha wê ya li Qendîlê kiribe û xwestibe ko hemû endamên partiyê ji holê rake jî ti caran bi ser neketiye. Çawa dibe ko dewleteke mîna Îranê ko dîrekt bi PKK-ê re ne di nav şer de ye û esas kula wê PEJAK-e, destê xwe bihejîne û biçe serokê wê partiyê desteser bike û bîne? Gotineke kurdan ya xweş heye: “Yê dibêje dîn e, ma yê guhê xwe didiyê jî dîn e?” Yê haya wan ji pîşeyê leşkeriyê nebe jî vêya hanê bawer nake.

Ya dudoyê: Bi vê bûyerê aşkere bû ko hem rayedarên dewletê hem jî pirtirînê qelemşorên çapemeniyê hêjan pirsgirêka kurd fêm nekirine, hêjan li pey mucîzeyan in ko hin herin fermandarên PKK-ê ji wan re bigrin, bînin. Hêjan rizgarbûna xwe ya ji PKK-ê di girtina lîderên wan de dibînin. Çima haya wan jê nîne ko şexis cuda ne, doz cuda ne. Şexis dibe ko bimirin, bêne kuştin, bi awayekî ji holê rabin, lê belê doz herûher baqî ne, bi şexsan ve ne girêdayî ne. Hele doza netewaya kurd ko ev dused sal in berdewam e qet nabe ko bi şexsan ve were girêdan û bête zen kirin ko eger serokên wê dozê ji holê rabin wê ew doz raweste.

Belê ji serîhildana Bedirxanê mezin û vir ve hemû serokên wan serîhildanan hatine girtin û kuştin lê doza wan ji holê ranebûye, dijaneyên li pey wan hatibûne ji wan serîhildanên beriya xwe îbret girtine û bi awayekî tûjtir tevgeriyane. Şêx Seîdê Kal, Seyîd Riza, Qazî Muhemmed, Yusuf Zîya, Xalid Beg … çendik ji wan serokan in ko ji hêla de dewletê ve hatine qetil kirin.

Gelo ma damezrînerê PKK-ê bixwe jî di sala 1999-ê de nehatiye girtin û ev serê yanzdeh salan e ne di destê wan de ye? Ma girtina wî bû sedema jiholêrabûna doza wî? Na. Ji ber ko eger ew biçe sedên din hene ko cihê wî bigrin.

Ji ber wê çendê pêwist e her kes hişê xwe bîne serê xwe û kêfa xwe ji tiştên bêencam re neyne. Bila haya her kesî jê hebe ko pirsgirêka kurd hebû, niho jî heye û hetanî bi awayekî dadmendane neyê çareser kirin jî wê her hebe. Hetanî hebe jî wê rehetî ne ji kurdan re hebe, ne jî tirkan re.

Bawer im ev barê giran dikeve ser milê AKP-ê. Lewre ya herî zêde ji herêma kurdan deng wergirtî bêguman ev partî ye. Dîsa mirov dikare bêje ko mebesta wan kesên ko dengê xwe dayîne AKP-ê ew e ko ev partî pirsgirêka kurd bi awayekî aştiyane çareser bike.

Ji ber vê çendê çareserkirina pirsgirêka kurd ji AKP-yîyan re dibe wek meseleyeke wijdanê jî.

-----------------------------------

Nivîskar: ABDULKADIR BÎNGOL abdulkadirbingol@gmail.com
Weşandin: 2011-08-16
Xwendin: 6515