SWÎD, 31/12 2005 — Sallî 2005 qonaxêkî gewre û dîyar bû le zincîre hengawêkî siyasî da ke Kurdistanî le çendîn sallî rabirdû da pêda têperrî. Cige le dengdan bo hellbijardinî perlemanêkî katî Êraq û perlemanî dahatûy çiwarsalley Êraq ke nwênerayetî û desellatî Kurdistanî le Êraq da cêgîr kird, dû rûdawî dîkey giring şayistey hellwêsten.
Yekem: Hellbijardinî serokî Kurdistan ew pirroseyey geyande encam ke le sallî 1992 da le ber gelêk hoy ciya û alloz nehate dî. Le çiwarçêwey siyasî Kurdistan da yekgirtinewey Perlemanî Kurdistan le sallî 2002 da helumercî ew birryarey amade kird, bellam em hengawe bê pêşbînî û hawkarî û birryarî serkirdayetî siyasî, her lew salle da, bo ew gorrankariye gewreyey le Êraq da be rrêwe bû be asanî nedehate dî.
Duwem: Beşdarî çalakanî nwênerayetî Kurdistan le nûsînî desturî Êraq û dengdanî gelî Kurdistan bo pesendkirdinî ew desture bercestekirdinî bîrî serleniwêdirustkirinewey dewlletî le Êraq da le çiwarçêwey xewn û qise û nûsînewe giwastewe bo biwarî saziş, rêkewtinî siyasî û darriştinî le deqêkî yasayî da.
Em dû hengawe serekîyey sallî 2005 bê berdewamî rêkewtin le nêwan hêze siyasiyekanî Kurdistan da ne ew encame serkewtuwey debû û ne rê xoş dekira bo pitir awedankirdinewey Kurdistan û billindkirdinewey astî bawerrpêkirdin û çawerrwanî xellkî Kurdistan beramber serkirdayetiyekey û ayindey Kurdistan. Hawrrê legell em dû hengaweş da dû karî giring cêy serinc e. Yekem: Nwênerayetî Kurdistan û hawbeşî desellat le qonaxî gorrankarî le Êraq da. Duwem: Piştgîrîkirdinî hawpeymanî Kurdistan bo kandîdkirdinî nwênerêkî xoy bo serokkomarî Êraq û rêkewtin legell hêzî siyasî şîe bo maweyekî kurt derbarey çonêtî berrêwebirdinî hikumetî katî.
Em hengawane destkewtî mezin in eger le riwangey mêjûy siyasî şeşsed salleê Kurdistanewe bibînirên. Lew maweye da beşî here zorî gorrane gewrekanî Rojhellatî nawerrast le berjewendî kurd û Kurdistan nebuwe, bellku bûnete hoy lenawbirdinî desellat û dezge û serçawekanî Kurdistan. Bellam be pêçewaney rewtî rabirdû, sallî 2005 biritî bû le karkirdin bo parastinî destkewtekanî Kurdistan û cêgîrkirdinî desellatî siyasî Kurdistan û serlenwêdirustkirdinewey dewlletî Êraqî le ser dû xwastî serekî hêzî siyasî Kurdistan, ewîş be fîdirrallîkirdinî dewlletî Êraq û hewilldan bo pirewdan be pirrosey dîmukrasî le Êraq da.
Gorrankariyekanî sallî 2005 buwe hoy behêzkirdinî xwastî Kurdistaniyan bo parastinî destkewtekan, bo piyadekirdinî mafî dîmukrasî le rêy dengdan le hellbijardirekanî mangî yek û mangî duwanze da û pesendkirdinî desturî Êraq. Em destkewtane rêzlênanî karî sextî siyasî çendîn sede û qurbanî û şehîdan û enfalkiraw in û xêzenekaniyan. Em destkewtane ciwantirîn çepkegull in bo razandewey gorrî xobextkaran. Ciwantirîn diyar în bo weçey dahatûy Kurdistan. Ciwantirîn diyar în bo awdankirdinewey Kurdistan. Bellam wek gişt karêkî giring, wek gişt çepke gullêkî razawe, pêwîstiyan be çawdêrî û awdan û amadekirdinî hewlumercî geşey berdewam heye.
Eger sallî 2005 ezmûnî dahatûy Kurdistan diyarî bikat, hawkarî, hawbeşî, stratîjî dirêjixayen bo parastinî Kurdistan û destkewtekanî, behêzkirdinî pirosey dîmukrasî le Kurdistan û Êraq, allozî pirrosey sazişî siyasî, tirsî bêwefayî hendêk le hêze siyasiyekanî Êraq beramber rêkewtiniyan le gell hawpeymanî Kurdistan, behêzbûnî xwastî gelî Kurdistan bo bedîhênanî xewnî serbestî û azadî, herreşey willatanî dirawsêy Kurdistan beramber destkewtekan, berdewambûnî awedankirdinewey Kurdistan, bezandî sinûr û rizgarkirindî Kurdistan le zîndanî cugirafiyay paş sallanî 1920 be kirdinewey peywendî hewayî le gell cîhanî derewe û daxwazî pêkhênanî hikumetêkî hawbeşî Kurdistan sîmay giring û serekî sallî dahatû debin.
Bo berdewambûnî gorrankariye pozetîvekan û rûberrûbûnewey metirseyekan, dekrêt le kotay sall da her hawllatêkî Kurdistan, eger her nebêt le dillî xoy da, çepkegullêk pêşkeş be serkirdayetî û serokatiyetî Kurdistan bikat ta le ser karî giring û alloziyan, be wirey berzu pişgîrî gelî Kurdistanewe, berdewam bin. Pêzanîn û berpirsiyarî, pêşbînî û fêrbûn le ezmûnî tall û şîrîn, gerentî serekî serkewtin le sallanî dahatû da debin. |
