Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Werçerxanek di dîroka me ya nûjen de

STOCKHOLM, 8/5 2006 — Duhî, 7-ê gulanê, hikûmeta yekgirtî ya Kurdistanî çêbû û heta eger hindek vê bi zewaca sîxekirî di navbera PDK-ê û YNK-ê jî bi nav bikin, bi vê gavê yek ji xewn û daxwazên xelkê me bi cih hat. Îro li başûrê Kurdistanê yek parlamento, yek serok û yekhikûmeta kurdî heye. Bi resmî demê duîdareyan derbas bû û qonaxeka nû di dîroka me kurdan ya siyasî de dest pê kir.

Bêguman bo lihevhatinê dikarin rêçareyên jêk cida hebin lê ev awayê PDK û YNK jî li ser pêk hatine bi xwe rêçareyek e di çarçoveya pêçêbûnên wan yên pêkhatinê de di wextê hazir de. Pêkanîna hikûmeta yekgirtî ya Kurdistanê gava yekê ye di vê rêçareya wan de. Ev ne proseseka hêsan e, pêwîstiya wê ji bo serketinê bi gelek kar û xebat û wextî heye. Bo ko ev ezmûna nû ser bikeve û eger ne hemî jî, beşekê armancên vê lihevhatina nîştîmanî pêk bihên, pêwîstî bi gelek hedar û tolerans û fedakarî û hişyariyê ji hemî aliyên di hikûmetê de beşdar û bi taybetî PDK-ê û YNK-ê heye. Vê hikûmetê, bo ko ew bikare di xizmeta gel û welatê xwe de serketî be, pêwîstî bi arîkarî û piştevaniya me hemî xelkê Kurdistanê heye.

Vê hikûmetê, bo ko bi rastî bikare başûrê Kurdistanê bi civak û îdareya xwe ve bike kiyanekê baştir, saxlemtir, pêşketîtir, demokrat û azadtir û ewlekarî û êmnahiya kes û grup û rêxistin û sazî û sermayeyên navxweyî û biyanî baştir bike ji yên dewrûberê xwe gelek kar û xebata ko pêwîst e bike li pêşiya xwe heye.

Dirustbûna hikûmeta yekgirtî ya Kurdistanê gavhavêtineka pir gring e bo yekkirina navmala kurdî û gotara siyasî ya kurdî û saziyên neteweyî û bihêzkirina gotin û rola kurdan li ser astê Îraqê û derve jî. Ew bihêzxistinek e bo morala hemî kurdan, li hemî parçeyên Kurdistanê di xebata wan ya neteweyî de. Ev herweha dirbeka mezin e bi neyarên azadiya kurd û Kurdistanê û siyasetên wan yên nijadperistî dikeve.

Me hemiyan gazinde û gilî dikirin ko Kurdistan duîdare û duhikûmet û duserok û du desthilat e, parsal em bûn xwediyên yek parlamentoyê û yekserokî û niho jî çêbûna vê hikûmeta lihevhatina nîştîmanî dawiya wê qonaxê ye ya ko em jê nerehet bûn. Ev hikûmeta nû dikare ji başî û çewtî, ji evrazî û nişîvî, ji ketin û serketinên qonaxa derbasbûyî û îdare û kabîneyên çûyî û bi taybetî ji binasên peydabûna duîdareyiyê li Kurdistanê gelek ders û îbretan werbigire. Ev gaveka siyasî ya jîrbar e û kartêkirina xwe ya baş dibe li ser rewşa me kurdan di warên cida de li Kurdistanê û herêmê û cîhanê. Ev ji me hemî kurdan re hêvîgeşker e û divêt me hindî pê çê dibe em bi çi rengekî nehêlin deriz bikevin vî avahiyê me yê siyasî yê nû û wenekin ew têk biçe û em hemî lê bi xudan der bikevin û vê destketa xwe ya neteweyî biparêzin, pêş bixin û bihêz bikin. Avabûna vê hikûmeta me ya yekgirtî werçerxanek e di dîroka me ya nûjen de û ew li me û li hemî xelkê Kurdistanê pîroz be.

-----------------------------------

Nivîskar: Sidqî Hirorî
Weşandin: 2006-05-08
Xwendin: 5726