Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Kurdên Swêdê zîrek in yan jî tembel in?

STOCKHOLM, 5/10 2007 — Hema hema heroj li rojnameyên Swêdê foto û nûçeyên kurdan belav dibin. Bo nimûne van heyaman heroj fotoyê Niştî Stêrk û Ozz Nûjen li rûperên kulturî yên rojnameyên herî mezin yên Swêdê de, wekî Dagens Nyheter û Svenska Dagbladetê, belav dibin, çima?

Belê, xanim Niştî Stêrk 11-ê vê mehê şanoya wê li tiyatroya Maximê li Stockholmê destpê dike. Herwisa tiyatroya Ozz Nûjen li Sodra Teaternê li merkeza Stockholmê berî çend rojan destpê kir.

Li Swêdê 105 000 kurd ji Îran, Iraq, Tirkiye û Sûriyeyê hene. Di civata Swêdê de rûmeta kurdan gelekê bilind e. Kurd di rojnamevanî û kulturê de pir li pêş in. Gelek caran xelatên herî mezin yên Swêdê digirin. Berî çend salan li Parlamentoya Swêdê xanim Nalîn heşt salan parlamenter bû. Bi saya serê lobiya kurdan ya ko li hev nekir eve çend sal e ko ti kurd di Parlamentoya Swêdê de nînin.

Ji aliyekê dî ve nûçeyên negatîv li ser danûstandinên kurdan û Swêdê belav dibin. Nêvbera Swêdê û kurdên Iraqê ne baş e. Çawa? Yekê îlonê wezîrê derve yê Swêdê Carl Bildt û wezîrê penaberan Tobias Billstrom çûn Bexdayê û neçûn Kurdistanê! Herdu wezîran meha adarê soz dabû ko biçin Hewlêrê û Silêmaniyê lê belê neçûn. Neçûna herdu wezîran gelek siyasetmedarên kurd li Silêmanî û Hewlêrê aciz kirin.

Gelo çima kurdên Swêdê biserketî ne lê belê welatê Swêdê qîmeta Kurdistana Iraqê nagire? Ecêb!

Sebeb pir in û belkî zû be ko mirov hinek tiştan binivîsîne. Lê belê dixwazim hinek tiştan îro bibêjim. Kurdên Swêdê wekî hemwelatiyên Swêdê di civateke demokratîk de bi ser dikevin. Ne ji bo xatirê Elo yan Celo. Kurd ne wekî netewe lê belê wekî ferd bi ser dikevin. Siyasetmedarên kurdan yan nûnerên hizbên kurdan li Swêdê karekê têr û rast nekirine.

Heger lobiya kurd kûr û berfireh kar kiriba û li nav kurdên zîrek de dostaniyek peyda kiriba ev valabûna lobiyê çênedibû û bi dehan wezîrên Ewropayê dê biketina dorê da biçin Kurdistana federal. Erka kurdên berpirsiyar heger ne hesabên biçûk, neyarî û fesadî bûya kurdên Swêdê jî dê baştir kar bikirina. Lê belê dema ko siyasetmedarên kurdan kursiyê xwe danegirin yan jî li ser deh kursiyan rûnin û xwe modernîze nekin hingê kurd di dîplomasiyê de qels dibin.

Hê jî ne dereng e. Çareserî heye. Bila kurdên li Kurdistanê zanibin ko rewşa kurdan wekî nefer li Ewropayê baş e. Roja ko hejmara ewropiyan di programeka Kurdistanê de ji hejmara mêvanên Niştî Stêrk û Ozz Nûjen zehftir bin wê rojê dîplomasiya kurdan biserketî ye. Lê belê ez bawer im em dê gelekê ji bo wan rojan bisekinin! Înşaellah ez şaş bim.

-----------------------------------

Nivîskar: KURDO BAKSÎ
Weşandin: 2007-10-05
Xwendin: 13708