Nefel

[ ŞEMÎ, 2024-12-21 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Ev nivîsar ne xatirxwestin e

STOCKHOLM, 31/1 2008 — Rojane hejmarên mezin yên kesan li vê dinyaya me ciyê karê xwe yê rojnamevaniyê yan nivîskariyê di rojname û kovaran yan di radyo û televizyon yan di rojnamevaniya dîjîtal de diguhorin û bê şik dê her kesî egerên xwe yên wê xweveguhastinê hebin.

Min di sefera xwe ya nivîskarî û rojnamevaniyê de, ji bilî ko bi hezkirin û bê menfeeteka şexsî ya madî ev kar kiriye, her li pey xwenûkirin û xwedewlemendkirinê bûm û xwestiye tevlî tecrubeyên nû bibim. Nefel jî yek ji wan tecrubeyan bûye. Tê de ziman bi rênivîs û rastnivîsê ve, nûçeçêkirin bi perspektîfên kurdî û metodên kartêkirinê bi rêya nûçeyan li ser raya giştî ya kurdî û nivîsandina kolumnan ji min re hîngehek bûye.

Rastiyek heye û kesê xudan wijdan û xudan sivilkurage be dê wê bi dengekê bilind û bisteh bêje, ko em mirov her suxte û feqeyên vê jiyanê ne û dê heta mirina xwe jî, jê hîn bibin, em çi carekê di hemî warên zanînê de tam û kamil nabin û her dê hebe ya em dikarin jê hîn bibin.

Niha jî ko ez ji Nefelê bar dikim bo malpera (www.kulturname.com)-ê ya ko dê di paşerojeka nêzîk de vebibe, qet nahêt wateya guhortina heval û dostan û tifkirin li wê kaniya mirovî carekê av jê vexwarî. Ev geryan e li pey tecrube û dewlemendiyên nû û ev ji mafê şexsî yê her kesî ye, çi bi profesyonelî û xweterxankirineka tam ji bo hindê û çi jî wekî mijûlahiya şexsî ya piştî kar û wezîfeya xwe ya resmî.

Me çend kesan di demekê gelek berî niha de, hizra vekirina malperên xwe yên taybetî (yên şexsî) dikir, paşî em ev çend kes, piştî çend gêngaşeyan, li ser hindê li hev hatin ko çêtir e eger em malpereka ko bes bi kultûrê bi tenê ve mijûl bibe vebikin û xwe konsantre bikin li ser wê dinyaya gelek berfereh ya kultûrê.

Ev dîtina me ya van çend kesan bû biryar. Wekî hûn dizanin em, wekî gelek kes û kurdên din, vî karê xwe bê pere û ji hezkirina xwe bo nivîskarî û rojnamevaniyê û di wextên xwe yên vala de dikin. Ez bi xwe normal rojê heşt seetan li şirketekê kar dikim û zarokên min hene ko pê re mijûl bibim, êdî wextê min yê vala bo mijûlbûnê bi bêtir ji malperekê namîne û ji ber hindê jî ez nikarim zêdetir di Nefelê de berdewam bibim.

Êdî ez ji xwendevanan re dibêjim ev ne xatirxwestin e û hûn dizanin dê min li kû derê bibînin û hêviya berdewambûn û pêşketinê bo Nefelê û stafê wê dikim.

-----------------------------------

Nivîskar: SIDQÎ HIRORÎ
Weşandin: 2008-01-31
Xwendin: 18599