Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Hikûmeta Kurdistanê jin ji bîr kirin

STOCKHOLM, 30/10 2009 — Roja çarşemê serokwezîrê Kurdistanê yê nû Berhem Salih kabîneya nû ya wezîran diyar kir. Çavê miletê kurd û dinyayayê li ser vê guhortina demokratîk ya li Kurdistana Iraqê bû. Gaveka gelekê dîrokî hat avêtin. Serokwezîrê berê Nêçîrvan Barzanî bi dilekê xweş desthilat teslîmî Berhem Salih kir.

Wekî kurdekê Swêdê tişteka dî jî ez kêfxweş kirim. Ji 19 wezîran sê ji kurdên Swêdê ne.

Belê, Ebdulkerîm Sultan Sincarî (wezîrê daxilî), Semîr Ebdullah Mustefa (wezîrê turîzmê û belediyeyan) û Enwer Cebelî Sabo (wezîrê transport û komunîkasyonê) li Swêdê jiyane û wekî ko ez dizanim hemwelatiyên Swêdê ne. Kombînasyona kurdên diyasporayê û kurdên Kurdistanê dikare gelek berhemên baş bide neteweya kurd.

Wezîrê elektrîkî nehatiye hilbijartin lê belê dîsa jî mirov gava ko bi çavên nêzîk li navan binêre nûçeyeka nexweş dibîne. Xebatek ji bo wekheviya jinan û mêran di vê kabîneya nû de nîne. Ji 19 wezîran tenê jinekê yanî Asos Necîb Ebdullah (wezîra karên civakî û bazara kar) di vê kabîneyê de cih girtiye. Yanî li Kurdistana Iraqê jineka dî ko bikare bibe wezîr nebû!

Kabîneya nû ji hemî hikûmetên Kurdistanê yên ji sala 1992-yê ve kêmtir jin hene. Ev prosesa taze ya bi domînansa zelaman û kêmbûna jinan di hikûmetê de me kurdên diyasporayê dixe rewşeka nexweş û cidî de.

Gelo desthilata Kurdistana Iraqê çi sînyalan dide dinyayê? Ev rewş dê çi probleman ji ji bo lobiya kurdan peyda bike? Çima berê hejmara jinan di hikûmetê de zêdetir bû û niho kêmtir e? Wijdana kê qebûl dike ko hejmara jinan li Parlamentoya Îranê ji hejmara jinan li Parlamentoya Kurdistanê li Hewlêrê zehftir be?

Li gor van sînyalan li Kurdistana Iraqê desthilat tenê di destê mêran de ye. Ferqa Kurdistanê û welatên cîran nîne. Wexta ko Emerîkayê li Iraqê xist berûirsiyarên kurdan behsa demokrasî û wekheviyê kir. Iraqa berê nema.

Li Ewropayê karê lobîîstên kurd her roja ko diçe zehmettir dibe. Ne ji zû ve ye ko parlamentoyê qanûna dujiniyê qebûl kiribû û rê ji anîna gelek jinan re vekir. Niho jî vêca di kabîneya nû ya hikûmetê de jin nînin.

Dostên kurdan li cîhanê kêm in. Heger em kurd zêdetir demokratîk nebin ferqek di nêvbera me û Bexdayê de namîne. Heger em demokrasiyê nexwazin welatên desthilatdar dê arîkariya me nekin.

Bêyî arîkariya welatên mezin yên desthilatdar Kurdistan jî nikare bibe welatekê serbixwe.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2009-10-30
Xwendin: 16663