Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

AKP kurdan wekî netewe nabîne

STOCKHOLM, 28/5 2011 — Roja 12-ê hezîranê li Tirkiyeyê hilbijartinên parlamentoya çêdibin û çavên kurdan û cihanê li ser van hilbijartinan e. Çima? Giringiya van hilbijartinan ji yên berê zêdetir e çimko ew dikare temenê demokrasiya Tirkiyeyê dirêj yan kurt bike.

Ev cara yekê ye ko partiyên legal yên kurdan bi hev re platformekê çêdikin û bi yek dengî beşdarî hilbijartinên sala 2011-ê dibin. Hevkariya kurdan ji aliyê bi milyonan kurdan ve hat hembêz kirin û tenê çend rewşenbîrên kurd li dij derketin.

Panoramaya parlamentoya li Enqereyê dikare pir bêt guhortin ji ber îhtimal heye ko MHP nekaribe baraja ji % 10-ê derbas bike. Kasetên vîdeoyê yên seksê ko giregirên MHP-ê tê de bûn aşkera bûn û ketin Internetê. Ew kaset dikarin tesîreke negatîv li MHP-ê bikin.

Ev hilbijartin ji bo têkiliyên di nêvbera AKP-ê û kurdan de jî dikare bibe pîvanek. AKP-ê van neh salên dawiyê hinek gavên pozîtîv avêtin lê belê bi wan çend gavan daxwazên kurdan pêknehatin û kurd tetmîn nebûn. TRT-6 vebû lê belê bingehekî wê yê qanûnî û saxlem nîne. Heger di meha hezîranê de desthilat ji destê AKP-ê derkeve TRT-6 jî dikare nemîne.

AKP-ê heta nuha jî xwe nedaye ber wê çendê ko hebûna miletê kurd têxe qanûna esasî (Anayasa) de. Azadiya zimanê kurdî hê jî li gor qanûnan nehatiye garantî kirin. Nêzîkî 80 rojnamevan ji ber nivîsên xwe di zîndanên Tirkiyeyê de ne.

Divêt em pirseka dî jî bikin: Paketa demokrasiyê ya AKP-ê gelo ji dil e yan jî siyaseteke nedirist ya mijûlkirina kurdan e? Serokwezîr Erdogan dibêje “pirsa kurdî” heye û di mitîngan de kitêba Ehmedê Xanî “Mem û Zînê” dihejîne lê belê qebûl nake ko bi milyonan zarokên kurdan li dibistanên dewletê zimanê xwe yê zikmakî bixwînin.

Erdogan behsa stranên Şivan Perwer dike lê belê heta nuha jî ji bo muzîka kurdî konservatuarek venekiriye. Hê jî gelek kes ji ber ko di navê wan de herfa “w” yan jî “q” heye nikarin nasnameya xwe wergirin. Heger AKP-ê ji kurdan hez bikira divêt wê baraja ji % 10 rakira. Yekîtiya Ewropayê heta nuha deh caran dewleta tirk ji bo baraja bilind û nedemokratîk protesto kir lê belê AKP barajê danaxe û dihêle ko ji kurdan zehmetî çêbe.

Gelek kurd dibêjin ko wan ji polîtîkaya AKP-ê tiştek fêm nekir. Balî min fêm kiribe: AKP kurdan wekî qewmiyetekî yanî wekî neteweyekî nabîne. AKP kurdan wekî tirkên ji ummeta misilmanan dibîne. Problema AKP-ê ev e. Rast e ko AKP ji ordiyê ditirse lê divêt piştî hewqas salan generalên kemalîst ji karê wan bavêta.

AKP ne tenê li Tirkiyeyê karê kurdan xirab dike. AKP li Bexdayê, li Şamê û li Tehranê jî karên kurdan xirab dike. Ev tişteke cidî ye. Meselen piştî hilbijartinên Iraqê yên sala 2010-ê serokkomarê Tirkiyeyê Abdullah Gul çû Bexdayê ji bo ko birêz Celal Talebanî careke dî nebe serokkomarê Iraqê.

Nuha jî Tirkiye lêdixebite û dibêje bila welatên xerbê êrişî Sûriyeyê û Beşar Esed nekin. Çima? Tirkiye û AKP ditirsin ko kurdên Sûriyeyê hinek mafan bi dest bixin û herêmeke federal digel Sûriyeyê ava bikin. Yanî rewşa Kurdistana Iraqê li Sûriyeyê dubare bibe.

Divêt kurd hişyar bin û careke dî bi lehîstikên klasîk yên osmaniyan ko kurd parçe dikirin neyên xapandin.

Ji ber vê yekê ez hevkariya Kadep, Hak-Par û BDP-ê di cih de dibînim û dema aştiya navxweyî ya kurdan ji zû de hatibû. Belê, kurd wekî berê bi hev re şer nakin. Na, ew bi hev re li ser esasê kurdayetiyê hevkariyê dikin û doza mafên xwe dikin. Şûna ko kurd bi partiyên tirkan re platforman çêkin ew dixwazin bi hev re kar bikin, ma ji vê baştir çi heye?

Ez hêvî dikim ko kurd di 12-ê hezîranê de 40 kursiyên parlamentoya Enqereyê bi dest xwe ve bînin.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2011-05-28
Xwendin: 13771