Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Ji çirîskên festîvala Dihokê

STOCKHOLM, 8/10 2005 — Li nik me ko kesek dibe serok yan serokwezîr yan serok û sekreter û endamê polîtbîroya partiyeka desthilatdar yan serliq û sermelbendê wê êdî ew ji rexneyê bilindtir e. Nabe li welatê me kes yan çi rojnamevan vekirî di rojname û kovar û radyo û televizyonan de rexneyan lê bike yan derzên di jiyana wî ya kesînî de berçav bike yan şaşiyên wî destnîşan bike yan hema bibêje ko mûyek di pirça wî de xwar e, heke dê ew kes bi hêsanî bi ajanî û casûsî û xiyanet û xudê dizane çi ya dî hêt tawanbar kirin. Ne dûr e yên ko van qeyd û prensîpan jî dadinin her rojnamevan û nivîskar bi xew bin û dibe jî kesine berpirsyar di van partiyan de li pişt hindê bin.

Em hertim xwe bi hindê qayîl dikin ko rewşa me pir xerab e û dewleta me nîne û dijminên serxwebûn û azadiya me pir in û niho ne wextê hindê ye û ya çêtir ew e em nuke dengî ji xwe neînin û vekirî rexneyan li desthilata siaysî ya kurdî negirin û xwe li têla monopolkirina desthilatê û genîbûna di nav dezgehên îdarî de nedin da ko dijminên me ji xwe re wê wekî çekekî li dijî me bi kar neînin û ya çêtir ew e em xwe bêdeng bikin heta ko kiyanek ji mer re peyda dibe.

Lê pirs nema girêdayî wan tenê. Hizir bikin ko rojnameyeka kurdî ya hefteyî ya seranserî jî hêrişê dike ser rojnamevanekî ko hinek ji rastiyên wê yên veşartî berçav kirine û dibêje nabe ew karekê weha bike ji ber ko ew rojnameyeka kurd û Kurdistanê ye û me weha tê digehîne ko kirêtkirina navê wê kirêtkirina kurd û Kurdistanê ye. Eger mirov li ber mînakên weha bê deng bibe dê kirsaê kurd û kurdistaniyê bo xweparastinê li ber rexneyan hêt bi kar anîn û ev qet ne diyardeyeka saxlem û baş e.

Dema Nefel di warê festîvala rewşenbîrî ya Dihokê de bala xwendevanên xwe dide ser ya ko kes behsa wê nake, hemî tore dibin û hinek yên ko xwe bi nivîskar jî dizanin weha bisteh dikin ko bibêjin ko bêhna ajanî û casûsiyê ji nivîsên weha têt.

Ev xwelîseriya me ye. Divêt hemî ji mêhvandarî re şukurdar bin û ev karekê kurd û kurdistanî ye û ji ber hindê jî guneh e mirov rexneyên weha lê bike. Bi wateyeka din, divêt mirov lê bi xwedî derbikeve û behsa başiyan bike û destxweşiyan lê bike û neçe ser kêmasî û şaşî û diyardeyên ko dibin egera kêmbihakirin û şkandina berpirsiyarekî yan rêberiyekê yan çalakî û bizavekê. Weha ji me re ew dimînin yên ko aliyê baş û qeşeng nîşan didin û spasî û medhan dikin û destan diqutin û ew eger ne hemî bin piranî ne.

Heyranîno, xwe divêt hinek behsê wan alî û bûyerên ko kesê amaje pê nekirî jî bikin. Karê rojnamevaniyê ne bes veguhastina aliyê baş û dilxweşker yê nûçeyan e û ne bes berçavkirina tiştên mezin e di bûyeran de, lê belkî bêtir ji hindê berçavkirina wî aliyî ye yê ko yên din nabînin yan gelek naxwazin ew alî bêt dîtin. Karê rojnamevainyê her weha balkişandina xwendevanî ye bo ser xirde û pirsên biçûk û veşartî, karê wê ew e bikare bibe xwedî rol di avakirina raya giştî de, karê wê ew e ko weha bike ko subehî kesên berpirsiyar di kar û axiftin û reftar û berpirsiyariyên xwe de hişyartir û miqatetir bin û weha bisteh nekin hertiştekî û her axiftinekê hema bikin, bê pîvan û hilsengandin û plandanan.

Yên dibin berpirsiyar êdî normal dibin kesên giştî û gotin û reftar û kar û kiryarên wan gelek bêtir ji kesên neberpirsiyar dikevin di mîzanê de û rojnamevanî zêrevaniyê lê dike. Ew jî ji ber ko ew êdî nûneriya xwe bi tenê nakin, lê herweha û bêtir ji ya xwe nûneriya wî alî yan wezîfeya giştî ya ew jê berpirsiyar in dikin. Rexneyên weha jî weha dikin ko haya berpirsiyaran ji gotin û reftar û kar û berpirsiyariya xwe hebe û ne karê rojnamevaniyê ye ko bi telefon û danûstandinên şexsî bi tenê dîtin û rexneyên xwe bigehîne alî û kesên peywendîdar. Lê karê wê ew e bi rêya navgînên xwe raya giştî li ser hemiyê û bi taybetî li ser parçeyên veşartî agehdar bike. Qet rexneya li pişt perdeyan ji berpirsyarekî yan ji kar û bizavekê kartêkirina xwe wekî rexneyeka vekirî di navgîneka rojnamevanî de nake û yek ji armancên rojnamegeriyê jî ew balkêşan û kartêkirin û dengjêanîn e.

-----------------------------------

Nivîskar: Sidqî Hirorî
Weşandin: 2005-10-08
Xwendin: 5246