Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Xeletiyên neyarên me xelatên herî baş in

STENBOL, 3/7 2011 — Ez nuha li Stenbolê me û berî çend rojan ji Diyarbekirê hatim. Roja hilbijartinan yanî 12-ê hezîranê ez li Diyarbekirê bûm û min ji nêzîk ve prosesa hilbijartinan teqîb kir.

Çend roj ne tê de hema bibêje ev zêdetirî 50 rojan e ko ez li Kurdistanê û li Tirkiyeyê me. Ji kurdan û tirkan ez bi gelek kesan re axivîm. Piştî sohbetên xwe ez gehiştim qenaetekî ko ji % 99-ê tirkan hê jî kurdan wekî neteweyekî cida nas nakin û ji termînolojiya wan mirov fêm dike ko niyeta wan nîne ti heqî bidin kurdan.

Du tiştan bala min kişand û ez pir aciz kirim. Bêjeya ”Dogu” û ”arîkariya ekonomîk ji bo Doguyê”. Ji herêma kurdan re dibêjin ”Dogu” û wisa didin xuya kirin ko dê bi hinek projeyên ekonomîk pirgirêka kuran çareser bikin. Çima? Ji ber ko di mejiyê tirkan de û zêdetir li nik berpirsiyarên tirkan hêjî hebûna kurdan nayêt qebûl kirin.

Ez sala 1980-yê ji Kurdistanê derketim û mixabin ew termînolojiya ko wê demê dihat bi kar anîn nuha jî wekî xwe maye.

Di hilbijartinên dawiyê de kurdan kurdan biserketineke mezin bi destê xwe ve anî û hem AKP û hem jî nasyonalîstên tirkan tirsiyan. Sihûşeş namzetên serbixwe yên kurdan bûn parlamenter. Di bloka kurdan de ji bilî BDP-ê kesên navdar yên wekî Şerafettîn Elçî û Altan Tan hene.

Ev cara yekê ye ko suryaniyek bi dengên kurdan dikeve parlamentoya Enqereyê. Vê nûçeyê gelek keyfa min anî û hêvî dikim ko hertim navbera kurdan û suryaniyan xweş be. Suryanî li Ewropayê û li derveyî Kurdistanê gelek tiştên negatîv di heqê kurdan de dibêjin lê belê kurd cardî jî camêr in û heqê cîranên xwe yên sedsalan naxwin! Bila herkes vê bizane!

Li Tirkiyeyê tu dikarî di hilbijartinan de bi ser kevî lê belê ew nayê wê maneyê ko dikarî bibî parlamenter. Komîsyona Bilind ya Hilbijartinan ya Tirkiyeyê (YSK) parlamenteriya Hatip Dicle xist û mehkemeyên tirkan jî rê neda ko pênc parlamenterên dî yên kurd ji zindanê derkevin.

Ev durûtî ye! Serokwezîrê Tirkiyeyê Recep Tayyip Erdogan di dema xwe de ji bo helbestekê ket zindanê lê belê sala 2022-yê wekî parlamenterê bajarê kurdan Sêrtê bû parlamenter û rê li ber wî vebû. Qanûn û hakimên Tirkiyeyê ji bo Erdogan pozîtîv biryaran didin lê ji bo parlamenterên kurd ko ji ber gotinên xwe tên mehkeme kirin eynî pozîtîvîzmê nîşan nadin.

Bûyereke hêj xirabtir ev e: Ew YSK-ya ko rê li ber namzetiya Hatip Dicle negirt piştî ko ew bû parlamnter û piştî ko mezbeteya xwe girt rabû û got çênabe ew bibe parlamenter. Madem çênedibû ko bibe parlamenter çima we rê dayê ko bibe namzet? Heger rê nedana Hatip Dicle kurdan dikarî kesekî dî wekî namzet nîşan bidin. Erdogan şerm nake û dibêje çima kurdan ew kes kirin namzet. Gelo çima Erdogan dengê xwe ji YSK-ê re nake?

Vê biryara YSK-ê Tirkiye hejand û hêjî krîz berdewam e. Grupa kurdan neçû parlamentoya Enqereyê û sonde nexwar. Grupê civîna xwe ya yekê li Diyarbekirê kir. Civîn li Kurdistanê çêbû ne li “Doguyê”. Heger ev proses wiha berdewam bike kurd dê gelek tiştan bi dest xin. Wekî li Kurdistana Iraqê dê xeletiyên neyarên me ji me re xelatên herî baş bin.

-----------------------------------

Nivîskar: KURDO BAKSÎ kurdo.b@hotmail.com
Weşandin: 2011-07-03
Xwendin: 13920