Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Kurdan li rojava û rojhilata Kurdistanê pêwîstî bi yekgirtina hêzên xwe yên siyasî heye

STOCKHOLM, 2/11 2005 — Civata Ewlekariya Neteweyên Yekbûyî roja 31/10 bi tevayiya dengên her 15 endamên xwe biryara 1636-ê di derheqa Sûriyeyê de derxist. Ev biryar li ser encama rapora Komisyona Navneteweyî ya lêkolînê di kuştina serokwezîrê berê yê Libnanê Refîq Herîrî de ya ko dadwerê elmanî Detlev Mehlisî pêşkêş kirî derket.

Sûriye bi Detliv Mehlisî û komisyona wî re ne rastgo û ne jî harîkar bû û lewma jî biryareka weha hat dan da Sûriyeyê baş ji guhan bigire û bibêjeyê eger tu ji îro pê ve tam bi Mehlisî û komisyona wî re harîkar nebî bizane dê Civata Ewlekariyê sizayine dijwartir mîna embargoya aborî û heta bikar anîna hêzê jî li dijî te bide ber xwe.

Mehmûd Ehmedînejadî jî bi serokkomariya ko wî ne ji zûde wergirtî sermest bûye û kela mêraniya kevnar lê daye û li serê xwe siyar bûye û şerê Îranê yê li dijî rojavayê gerimtir û gurtir dike. Ew vekirî gefan li Îsraîlê dike û wekî Xumeynî gotibû ew jî dibêje ko divêt Îsraîl bêt jinav birin.

Ew zêdebarî wan problemên ko melayan heta niho ji Îranê re dirist kirine dixwaze Îranê bi xelkê wê ve, wekî Sedamî bi Îraqê û Xelkê wê re kirî, tûşî şerekê malkembax li dijî Emerîkayê û hemî rojavayê bike.

Herdu rijêm dizanin ko jinavbirina Sedam Hisênî, jinavbirina diktator hejmar yek bû û gera diktatorên din jî têt. Ew dizanin ko lêdan û jinavbrina Sedamî û sîstema wî ya totalîtar mînak û dersek e bo tîraniyên din yên ko naxwazin di miadeleya siyasî ya nû ya cîhana me de bigehin û xwe li gor wê biguhorin. Zehmet e ko tîraniyên weha ji bilî serê bêvla xwe tiştekê din bibînin. Li nik wan ya di serê wan de ya herî rast e û ew jî wekî Sedamî bawer nakin ko hêzek li ser rûyê erdî hebe ko bikare wan ji desthilatê bavêje û bêxe nav zîndan û ber dadgehan û ev halê hemî tîranan e.

Herdu rijêm jî heta niho jî berdewam in li ser siyasetên înkar kirina mafên xelkê me yê kurd li wan herdu parçeyên welatê me, li ser zor û zilma etnîkî li hember kurdan. Tepeserkirin û girtin û kuştin û berzekirin û perîşankirina xelkê me kar û reftara van desthilatdaran ya rojane ye.

Guhorîn dê her çê bibe û ez jî hêvî dikim ko ew bê şer û xwînrijandin çê be. Lê ya herî giring ew e rêxistin û partiyên siyasî yên kurdî li herdu parçeyên Kurdistanê yên li bin zilma Îran û Sûriyeyê vê rastiyê baş bibînin û bizanin ko ev herdu tîranî jî li ser rêya berşiyê xwe Sedamî ne û dawî pêhatina tîraniyên wan ne dûr e. Divêt berî ew roj jî bihêt ev partî û rêxistinên kurdî xwe bi cidî û bêtir nêzîkî hevdu bikin, li her parçeyekê eniyeka nîştîmanî ya kurdistanî ya hevbeş çê bikin, program û stratejiyên xwe yên hevbeş bo wê rojê û bo qonaxa piştî wê dabinin. Pêwîst e ew hêz xwe bêtir nêzîkî xelkê xwe û daxwaz û êş û azarên wan bikin û bi rol û berpirsiyariya xwe li hember xelk û welatê xwe rabin. Divêt ew hêz û rêxistinên siyasî, bi xwe, vê şepirzeyî û pirt û belavbûna xwe mehkûm bikin û li dor armanc û bejewendiyên hevbeş bicivin û bixebitin. Nabe rêberên kurd yên siyasî li wan parçeyên welatê me xwe li benda wê rojê bigirin lê divêt ew xwe bo beşdarbûnê di çêkirina wê rojê de li ser astên navxweyî û derveyî amade bikin û gavên bisteh bavêjin.

-----------------------------------

Nivîskar: Sidqî Hirorî
Weşandin: 2005-11-02
Xwendin: 5877