Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

TRT-ya kurdî dê bibe rêveker ji bo hestên neteweyî

[SWÊD, 28/12 2008]

Ronakbîrê me Nûredîn Zaza çi digot?

— Kurdino heke hûn dixwazin bibin kurd û kurd bimînin, zimanê xwe hîn bibin…

Bedirxanîyan çi digot, çi difikirîn?

Ez li vir xebat û çalakîyên vê binemalê nanivîsim. Ez hew behsa xebata ji bo ziman û çanda kurdî tînim bîra we…

Gava dewleta kemalîst, di salên sîhî de, li kolanên bajarên Kurdistanê li kurdîaxêfan ceza dibirî, Celadet Alî Bedir Xan rojname û kovarên wek Hawar, Ronahî û Roja Nû diweşand û girîngî û rola zimanê kurdî dest nîşan dikir…

Dizanîn ko fikra neteweyî lawaz e, divîya bête xurt kirin.

Ji lewre dest avêtin ziman û kultura kurdî.

Hîmê ziman û kultura kurdî qewî kirin…

Nîyeta dewleta tirkan, çi dibe bila bibe, defakto bi destê xwe dê nasnameya kurditiyê xurt bikin… Ji lewre:

Kurdino li ber kanala kurdî rûnin.

Zimanê xwe hîn bibin.

Bila di dilê we de dengê Şakiro halan bide.

Bila dengbêjên kurdan bi hemî rengên xwe ji we re bilorînin.

Bila hezar kulîlk bi hemî rengan bişkivin.

Berê jî weha bû niha jî weha ye, di ruknên miletbûn û xurtkirina mefûma miletê kurd de, ruknê herî xurt û xurtker zimanê me ye.

Ruhê kurdayetî di zimanê me de ye.

Çanda me zimanê me ye.

Pêlên çemê kurdayetîyê bi kurdî kare rabe, wek barana biharê dawî li zivistana xedar bîne.

Nîrê miletên serdest sist bike.

Rê ji bo kurdayetîyê xweş bike.

Ji lewre ev kanal dê bibe zemîneke xweş.

Dê bibe rêveker ji bo hestên neteweyî.

Dê dîwarê ruhê bindestîyê li cem kurdan biterizine.

Kurdino, ji bo doza guherîn û danîna çarçeweya qanûnî hewl bidin.

Kurdino doza kanalên taybetî bikin.

Kurdino doza perwerdeya kurdî bikin.

Her dezgeha ko li Tirkiyeyê bi kurdî bigere, ev dezgeh dê bibe kevirekî saxlem ji bo avahîya kurdayetîyê.

Dê bazara zimanê kurdî vebe û xurt be.

Xwe lê bigirin

Kurdino, sîyaset bikaranîna firsetan e.

Va firsetek li ber destê we ye.

Kurdino, divê mirov li dij vê kanalê dernekeve.

Fermo kurdên ko karin bila ji kanala resmî ya dewletê baştir kar bikin.

Bila ji bo çand û zimanê me hezar kulîlk vebin.

Netewerperwerî hestên xeyalkirî ne.

Hîsên xeyalkirî di kurahîya dil û ruh de vedijin.

Bi ziman û kulturê xurt dibin.

Kurdino li qehwexaneyên Kurdistanê, li malên xwe dengê kanala kurdî rakin.

Zarokên we dê bibin kurd.

Nevîyên we dê bibin kurd.

Di weşana testê ya TRT-ya kurdî de, kurd serbest diaxivin.

Ji bilî gotina Kurdistanê her tiştî dibêjin.

Meraq nekin dê sibe disibe ew gotin jî bêne gotin.

Bi vekirina kanalê re hertişt çareser nabe.

Lê, li ber destê me dibe firseteke hêja û xurt.

Kurd dê karibin zorê bidin qanûnên Tirkiyeyê.

Kemal Paşa çi digot?

Digot: — Me mafê ziman û çandî da xelkên li balkanan û di dawîyê de ji me qetîyan…

Kurdino, li ser rêya asoya zimanê kurdî Kurdistan heye!

-----------------------------------

Nivîskar: SERDAR ROŞAN rosan21@nefel.com
Weşandin: 2008-12-28
Xwendin: 11348