Nefel

[ ŞEMÎ, 2024-12-21 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Li gor Ocalanî dewlet li kurdan heram e û li xelkên dî helal e

STOCKHOLM, 16/8 2010 — Avakirina dewletekê li ser axa welatê xwe mafê neteweyî yê hemî miletan e û ji hemî miletan zêdetir kurd layiqê wî mafî ne. Lewra jî serokê Kurdistanê Mesûd Barzanî li her derê dibêje avakirina dewleteka serbixwe mafê miletê kurd e lê belê ew niho federasyonê realîst dibînin. Rêberê Partiya Karkerên Kurdistanê Abdullah Ocalan heroj radibe-rûdine û behsa zerera avakirina dewleteka kurdî dike herçend federasyon jî be.

Ji roja ko rêberê PKK-ê Abdullah Ocalanî dest bi siyasetê kiriye û heta îro hertim wî xwe spartiye hêzên derveyî kurdan û geh xizmeta tirkan kiriye û geh xizmeta ereban li Sûriyeyê kiriye. Ew li kû jiyabe yekser ketiye bin kontrola hêzên îstixbaratî û eskerî yên wî welatî û ev xisletekê neguhorbar yê Ocalanî û rêxistina wî ye.

Lê belê cardî jî her hefte ew bi rêya aboqatên xwe dev davêje rêberên başûrê Kurdistanê û wan wekî ”nokerên emperyalîzmê” bi nav dike û dibêje heger ne bi Emerîkayê be ew nikarin rojekê jî li ser lingên xwe bisekinin.

Vê hefteyê cardî jî Abdullah Ocalan behsa xirabiyên çareseriya doza miletê kurd ya bi rêya avakirina dewletekê – herçend federal jî be – dike û dibêje federasyon jî xefkeka ”emperyalîzmê” ye ko hinek kesên wekî Şerefedîn Elçî ji bo bakurê Kurdistanê diparêzin. Dilê Abdullah Ocalanî bi bêdewletbûna kurdên bakur rehet nabe û dibêje dewleta federal ya li başûr jî ”xefkeka emperyalîzmê” ye û dibêje:

— Aşkera ye ko çareseriyeka bi dewletbûnê ne çareserî ye û dê meseleyê bibe niqteyeka xirabtir. Hinek kesên wekî [Şerefedîn] Elçî ko ji bo vêderê [ji bo bakur û Tirkiyeyê] federasyonê diparêzin hene. Lê belê aşkera ye ko modeleka wiha problemê çareser nake û dê wekî problema Filistînê birîna meseleyê kûr bike û bibe sebebê berdewamiya kaoseka sedsalî. Lewra jî em dixwazin rê li ber van [modelan] hemiyan bigirin.

Li gor rêberê PKK-ê Abdullah Ocalanî divêt kurd li bakur ti caran nebin xudanê desthilateka neteweyî û divêt wan ti caran qewareyekê siyasî bi navê federasyonê jî nebe. Ew ”xweseriya demokratîk” ko wî daye pêş û BDP jî xwedîtiyê lê dike ne desthilateka neteweyî ye û tenê desthilateka mehelî ya di çarçeweya belediyeyan de ye.

Xwedê kiriye ko hikmê Abdullah Ocalanî tenê li ser hinek kurdên bakur heye û ew nikare midaxeleyî başûrê Kurdistanê bike. Di heqê rêberên başûrê Kurdistanê û dewleta kurdî ya federal de Ocalan dibêje:

— Li başûr di eslê xwe de ew [kurd] ketin vê xefkê [xefka dewletavakirinê]. Ev xefka emperyalîzmê ye, eynen wekî ya li Filistînê. Vaye li Filistînê dewleteka lehîstoka emperyalîzmê ava kirin û wekî ko dixwazin midaxeleyî wêderê kirin. Ji ber hindê jî aştî ne têt Israîlê û ne jî têt Filistînê. Di eslê xwe de ya ko bi qewareyê Kurdistanê li başûr têt kirin jî ev e. Bi kêmî divêt mirov vê bibîne û nekeve vê xefkê.

Li başûr heger dewleteka federal ya kurdan bi navê ”herêma Kurdistanê” hebe ew bi saya serê têkoşîna miletê kurd û bi hezaranan şehîdên miletê kurd çêbûye û ti xêra wekî ko Abdullah Ocalan dibêje ”emperyalîzmê” di vê de nîne. Heger kurd bi xwe ne hêzek bûna ti dewletan û Emerîkayê jî ti hesab jê re nedikir.

Di dema hilweşandina desthilata dîktatorê berê Sedam Hisênî de û piştî hingê jî kurd û emerîkî gelek caran rûbirûyê hevdu bûn û kurdan bi quweta xwe ya li ser axa Kurdistanê gelek daxwazên xwe li Iraqê û li Emerîkayê dan qebûl kirin.

Iraq û Kurdistan parçeyek ji vê cihanê ne û rola siyaseta nêvdewletî di biryardana qedera Iraqê de heye. Xweşbextane rêberên kurd li başûr û nemaze serokê Kurdistanê Mesûd Barzanî bi siyaseta xwe ya realîst karî bibe aktorekê ko Emerîka û dinya hesabekê jê re bike û pê re biryarê li ser qedera Iraqa nû bide.

Başûr rêya xwe bijartiye û federasyon sîstemeka li gor qanûna esasî ya Iraqê garantîkirî ye. Ne Abdullah Ocalan û ne jî mitefiq û hakimên wî yên li Tirkiyeyê dikarên wê sîstema Iraqê têkbidin.

Heçî meseleya çareserkirina doza miletê kurd li bakur û Tirkiyeyê ye, ew jî bêyî federasyoneka li ser esasê dilxwazî û wekheviyê ne mimkin e çareser bibe. Wisa diyar e ko gelek tirk jî dê bên qunaxekê ko sîstemeka federal digel kurdan qebûl bikin lê belê rêberê PKK-ê Abdullah Ocalan dê her li ser rêya ”xelet” û mitefiqê hêzên ”xelet” yên li Tirkiyeyê be.

Abdullah Ocalanî ji zû de biryara xwe daye û lewra dibêje:

— Em baweriyê bi dewletavakirinê, çareseriyên bi rêya dewletavakirinê naînin. Eve bi salan e ko em vê dibêjin.

Rêberê PKK-ê Abdullah Ocalan karê xwe û ”xizmetkariya” xwe dike.

-----------------------------------

Nivîskar: ARIF ZÊREVAN zerevan@nefel.com
Weşandin: 2010-08-16
Xwendin: 14306