Nefel

[ ŞEMÎ, 2024-12-21 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Bi tesfiyekirina ekîba "kurdên Barzanî” Erdogan bi xwe dê bibe malê tarîxê

STOCKHOLM, 17/4 2011 — Serokwezîrê Tirkiyeyê Recep Tayyip Erdogan bi dereceya megalomaniyê ji rêya Xwedê derdikeve û dibêje ko ew dê “problema kurdan” li bakurê Kurdistanê “li ser esasê demokrasî û azadiyên ferdî” çareser bike û hebûna vê problemê bike malê tarîxê, yanî meseleyê wisa çareser bike ko careka dî behsê neyêt kirin.

Divêt mirov ji destpêkê ve ji Erdoganî re bibêje ko doza miletê kurd li bakurê Kurdistanê dozeka neteweyî ye û bi “demokrasiyê û azadiyên ferdî” qet çareser nabe û heger siyaseta Tirkiyeyê wiha berdewam bike gelek Erdoganên dî jî dê bibin malê tarîxê û ev doz her dê bimîne heta ko bi rastî ji kokê de çareser dibe yanî heta ko dewleteka kurdî ya serbixwe yan jî federal li bakurê Kurdistanê ava dibe.

Kurd ji qunaxa tirsê derbas bûn, kurd ji qunaxa “bratiya dînî” derbas bûn, kurd ji qunaxa parîmariyên hûrik yên wekî kanaleka televîzyonê û beşeka kurdî li unîversîteyekê derbas bûn.

Hinek caran dema ko ez li Stenbolê yan li Enqereyê li dostekê tirk rast têm dibêjin “ev problema terorê” dê çawa çareser bibe. Bersiva min jî hertim ew e ko “teror problemeka hêzên ewlekariyê yên Tirkiyeyê û PKK-ê ye” û dibêjim heger tu pirsa çareserkirina doza miletê kurd û tirk bikî ez dikarim bersiva wê bidim. Û bersiva min jî hertim wiha ye:

— Kurdistan ji kurdan re, Tirkiye ji kurdan û tirkan re.

Hercarê jî ecêbgirtî dimînin û ez wiha rave dikim:

— Li bakurê Kurdistanê yanî li wê herêma ko hon jê re dibêjin rojhilat û başûrê rojhilatê Tirkiyeyê kurd dê bi sîstemeka federal hikimdariyê bikin û îdareya xwe bikin. Li Tirkiyeya mayî jî kurd û tirk dê şirîkên hevdu bin û bi hev re îdare bikin. Ma mimkin e ko 3–4 milyon kurdên Stenbolê ne şirîkê desthilata Stenbolê bin û bi heman şêweyî kurdên Îzmîrê û Enqereyê ne şirîkê desthilata wan bajaran bin.

Ev ne xeyal e û ne jî fantazî ye. Ev qedera dewleta Tirkiyeyê û miletê kurd û miletê tirk e. Heger wekî dewletên serbixwe Kurdistan û Tirkiye ji hev cida nebin ji bilî vê rêyê ti rêyên dî nînin. Nimûneya herî baş ya vê jî Iraq û başûrê Kurdistanê ye.

Li Bexdayê kurd wekî netewe – ne wekî ferdên azad – şirîkê desthilatê ne û Celal Talebanî serokkomar û Hişyar Zêbarî jî wezîrê derve ye. Li Kurdistanê jî kurdan dewleteka federal heye û serokê wê jî Mesûd Barzanî ye û alaya wê jî alaya Kurdistanê ye.

Ev ne xeyal e û serokwezîrê Tirkiyeyê Recep Tayyip Erdogan bi xwe berî çend hefteyan çû Hewlêrê û li ber alaya Kurdistanê ji serokê Kurdistanê Mesûd Barzanî re got “rêzdar serok” û ev realîte bi çavên xwe dît.

Serokê Kurdistanê Mesûd Barzanî jî di wê serdanê de piştgiriyeka xurt ya siyasî da Recep Tayyip Erdoganî û got ew hêvî dike ko Erdogan di hilbijartinên bêt de careka dî bi ser keve da têkiliyên herdu welatan û herdu miletan pêşdetir biçin.

Sebebekê esasî yê wê piştgiriya Mesûd Barzanî jî ew bû ko li dorûbera Erdoganî hinek siyasetmedarên kurd hebûn ko xêra herdu aliyan û xêra herdu welatan dixwestin.

Piştî vegera xwe ya ji Kurdistanê, Erdoganî lîsteya namzetên partiya xwe ji bo hilbijartinên Parlamentoya Tirkiyeyê amade kir û 11-ê vê mehê ji lîsteya Ak Partiyê diyar bû ko wî hemî kurdên xudanşexsiyet yên li dora xwe tesfiye kirin. Erdoganî cih neda Mîr Dengîr Mehmet Firatî, cih neda Îhsan Arslanî û cih neda Haşim Haşimiyê ko wî gelek caran soz dabûyê.

Namzetên Ak Partiyê yên Kurdistanê piranî kesên wisa ne ko civata kurdan bi xwe jî wan nas nake. Kesên wekî Cengiz Çandar û Şerafettin Elçi jî dibêjin Ak Partî bi aliyê MHP-yîbûnê ve yanî bi aliyê nijadperestiya tirkî ve diçe.

Di programa hilbijartinan ya Ak Partiyê û Erdoganî de qet behsa çareseriyeka konkret ya doza miletê kurd nîne û Erdogan bi gotinên giştî behsa guhortina qanûna esasî ya Tirkiyeyê dike û dibêje ew dê “problema kurdan” bi demokrasiyê û azadiyên ferdî çareser bike. Ev gotinên giştî ne û xweseriyeka wan ji bo çareserkirina doza miletê kurd nîne.

Ya aşkera ew e ko Erdoganî di lîsteya xwe ya hilbijartinên 12-ê hezîranê de ekîba "kurdên Barzanî” tesfiye kir û hêdî ew nikare behsa 75 parlamenterên xwe yên kurd jî bike.

Di realîteyê de Erdogan îro bûye “hevkarekê veşartî” yê BDP-ê û firseteka mezin da BDP-ê ko li bakurê Kurdistanê xurt bibe. Hêj zû ye ko mirov bibêje, lê belê bi îhtimaleka pir xurt Ak Parti jî wekî dewleta kûr dixwaze li Kurdistanê tenê BDP û rêberê PKK-ê Abdullah Ocalan xurt bin.

***

Têbînî: Li Tirkiyeyê hinek nijadperstên tirkan û nemaze ergenekoncî, kurdên ko kurdayetiya xwe diparêzin û dibêjin ko miletê kurd jî wekî miletê tirk xudanê hemî mafên neteweyî ye bi sifetê "kurdên Barzanî" bi nav dikin. Lewra min jî di vê nivîsarê de ew sifet di nêvbera nîşandekên jêgirtinê de bi kar anî.

-----------------------------------

Nivîskar: ARIF ZÊREVAN zerevan@nefel.com
Weşandin: 2011-04-17
Xwendin: 15264