Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Şerefeddîn Elçî dê koma BDP-yê rewneqdar bike

CIZÎRA BOTAN, 24/4 2011 — Rêvebirên BDP-ê bi nîşandana birêz Şerefeddîn Elçî ya wek berendamê serbixwe gaveke girîng û dirokî avêtin. Her çiqas biryareke derengmayî be û dil dixwest ev yekîtî û bihevrebûn hêj di hilbijartinên berê de jî destpê kiriba dîsa jî sedema kêfxweşiyê ye.

Ez dê hestên xwe yên derbarê birêz Elçî de vebêjim, lê belê pêşî ez dixwazim hinkê li ser yekîtîyê rawestim.

Eger netewaya kurd di van dused salên têkoşîna rizgarîya xwe de serkeftin bidest nexistibe û dara wê têkoşînê hetanî îro berê xwe nedabe li gorî bawerîya min sedema herî girîng nebûna yekîitîyê ye. Lewra neyînîya bêyekîtîyê bi perçekirin û bêtaqetkirina hêzê sînordar namîne, ji bilî wê dibe sedema şikestina hêvî û omîda gel ya serkeftinê jî.

Ji xwe xetera mezin jî di vir de ye. Wek çawa di nav me de tê gotin: “Kurd nabin yek, kurd nabin tiştik.” Ev gotinên bi vî rengî bêguman encama nebûna yekîtîyê ne ko ketine ser zimanê gel. Mirov dikare bibêje ko gel jî hetanî derekê di bikaranîna wan gotinan de mafdar e û hetanî di nav sîyasetmedarên kurd de yekîtî çênebe wê mafdar be jî. Ji ber vê çendê ye ko Prensesa Kurda ya hêja Rewşen Bedirxanê nêzî wefata xwe, li ser pirseka xortekî kurd ev girîngî anîye zimên:

“…Kurê min ji hev hez bikin û hevûdin destek bikin. Kurê min bibin yek, tirtûbelav nebin... Kurê min, yekîtiya Kurdan bide min, ez ê Kurdistaneke azad bidime te.”

Ûstad Mele Seîdê Kurdî di Rîsaleya Biratîyê de derbarê faydeyên yekîtîyê de mînakên gelik balkêş dide:

Çar heb 1 (yek) li cihê cihê deran bin dikin çar. Lê eger ew herçar 1 (yek) weke birayan milê xwe bidin hev û li ser xêzekê xwe rast bikin li gorî zanyarîya matematîkê dibin 1111 (hezar û sed û yanzdeh). Herweha Çar hejmarên 4 (çar) li cihê cihê deran bin dikin şanzdeh. Lê eger ew her 4 (çar) weke birayan milê xwe bidin hev û li ser xêzekê xwe rast bikin li gorî zanyarîya matematîkê ew jî dibin 4444 (çar hezar û çarsed û çil û çar). Ev erênîyên yekîtîyê ne.

Du şihînên mezin hebin û di her serîyeke wê de du çîyayên qasî hev têde bêne kişandin, wê demê libeke goz dikare serîyekê rake jor û yekê jî daxîne jêr. Du pehlewan bi hev re şer bikin zarokek dikare kena xwe bi wan bike û bi wan bilîze. Ev jî neyînîyên neyekgitinê û bihevre-têkoşînkirinê ne.

Ji ber vê çendê ye ko hêzên serwer her dem pêşî berê xwe dane xirakirina yekîtîya dijberên xwe.

Birêz Şerefeddîn Elçî hêj di jiyana xwe ya xwendekarîyê de di nav refên niştîmanperweran de cî girtî ye û di vê xisûsê de bêtawîz tevgerîya ye. Ji doza 49-an bigre hetanî îro temeneke dirêj di vê rêyê de mezixandîye. Di dîroka komarê de weke wezîr yê kurdbûna xwe bi serbilindî dîyar kirî û di vê çendê de tu mehzûr nedîtî ew e. Di maweya wezîrîya xwe de gelik kurd kire xwedî kar; ew qas ko wek “Elçîyê rojhilat” hate bi nav kirin.

Taybetmendîyeke din a birêz Elçî ew e ko ez bixwe jî di sohbeta wî de bûme şahidê wê, hestîyarîya wî a li ser zimanê kurdî ye ko di sîyasetmedarên din de ev hestîyarî tune. Neku ji axaftina tirkî bi tenê re bertekê nîşan dide, peyvekê tenê jî ya di nav axaftina yekî ya kurdîyê de jî ranagre û hema bala wî kesî dikişîne. Eva hanê jî kesayetîya wî ya kurdewar û kurdîperwer nîşan dide.

Ji ber vê çendê em bi çavekê erênî li têketina birêz Şerefeddîn ya di nav refên berendamên serbixwe yên BDP-ê dinêrin. Em di wê bawerîyê de ne ko birêz Şerafeddîn dê koma BDP ya li meclisa Tirkiyeyê rewneqdar bike. Herweha dê dibe sedem ko dengê BDP-yîyan gurtir derbikeve û derbarê pirsgirêka kurd de encamên erênî derxîne.

Bes daxwaza me ewe ko ne birêz Şerefeddîn xwe di wê komê de weke mêhvan qebûl bike, ne jî koma BDP-yê bi wî çavî lê binêre.

-----------------------------------

Nivîskar: ABDULKADIR BÎNGOL abdulkadirbingol@gmail.com
Weşandin: 2011-04-24
Xwendin: 7945