Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Mele Mehmûd Bîlge û qesîdeya Bûrde

CIZÎRA BOTAN, 1/6 2011 — Qesîdeya ”Bûrde” ji aliyê Îmam Bûsîrî ve hatiye nivîsîn. Navê Bûsîrî yê tam Şerefeddîn Ebû Ebdullah Muhemmed binî Seîd binî Muhsîn binî Ebdullah binî Heyyanî … el-Bûsîrî ye. Di 1211-yê zayînî de li bajarê Behnesa-ya Misrê çavê xwe li dinê vekiriye.

Tê gotin ko ev hozanê gewre yê ereb di dawiya temenê xwe de falincoyî dibe. Ew bixwe serhatiya xwe ya vê nexweşîyê û nivîsandina wê qesîdeya navdar holê vedibêje:

“Min gelik qesîdeyên ko pesnê Resûlullah didan nivîsandibûn. Dema ez falincoyî bûm, min qesîdeya xwe ya gewre “Qesîdeya Bûrde” nivîsand. Dû re jî ji bo ko şîfayê bide, min ev qesîde kir wesîle û lava ji Xwidê kir. Min ew qesîde xwend û ez girîyam û di ber de ez nivistim. Min di xewna xwe de Pêxember (selat û selamên Xwedê li ser bin) dît. Destê xwe yê tiberik bi ser rûyê min ve anî û xirqeyek avête ser min. Di wê gavê de ez baş bûm.

Ev qesîdeya ko ji alîya navdarîya xwe ya di cîhana Îslamê de bêmened e, ji 161 malikan pêk tê. Li ser vê qesîdeya gewre hetanî niho ji 130’an zêdetir rave û werger hatine nivîsandin. Ji bilî wan jî gelik texmîs, tesdîs, tesbî’, teştîr û nezîre jî hatine amadekirin.

Mûftîyê berê yê Cizîrê nivîskar û lêkolîner Mela Mehmûd Bilge jî dest bi wergera vê qesîdeya giranbiha a bo Kurdîyê kiriye, lê sed heyf û mixabin, yan derfeta xilaskirinê bidest nexistiye yan jî temamîya wê neketîye destê me. Tenê haya me ji van duwanzde malikên li jêr çêbû ye.

Lê em dikarin bixemgînî vêya bibêjin ko xebatên Seyda yên di vî derbarî de pir û pir zêde bûn, ji ber ko meraqdarê vê çendê bû. Lê mixabin piştî wefata wî qîmeta reşnivîsên wî yên ko amadehîya berhemên hêja bûn nehate girtin. Ew jî bû sedema windabûna wan .

Qesîdeya Bûrde

Hate bîra te gelo hogir û dostên Selemê? (1)
Hêstirên xwînê dirêjînî ji derd û elemê.

Yan nexwe bayê nesîm hat ji cihet Kazimeyê?(2)
Yan vedaye beledîyan ji kinarê Îdemê? (3)

Kehnîya çavê te daîm dizitin wek lehîyê,
Ku j’enînê dilê miskîn di şevan naqerimê.

Tu gumanê mebe ko şewq û evîn xef dibitin,
Kifş bû ew şewt û girîna ko veşartîye Memê.

Nagirî tu ji xwe da ger te evîn nîne ji dil,
Dîn û har lew te dikin gotina Ban û ‘Elemê.

Ji evînê neke înkar ko du şahid te hene,
Hêstir û ah û fîxan te ji êş û seqemê.

Roj bi roj mislê bihê rûyê te zer bûye temam,
Tab û taqet biriha qor û zeîf î ji xemê.

Şewitandî me xiyala dilbera nazik û şeng,
Bike însaf ko nêzîk e biçime ez ‘edemê.

Bi Xwidê kî neke lewman bi minê jar û reben,
Ez birîndarê firaqê me ji wexta qidemê.

Kifş e halê me ji zarî û ji rengê min ê zer,
Laşê bê rûhe-mîsal im ez bi sond û qesemê.

Şîretê qencê te hetta ez qebûl nakime qet,
Kerr e aşiq ji îtaban û ji medh û ji zemê.

Ser û rih herdu sipî bûn, pîrîtî çûye serî,
Agirê işqê welakîn geş dibit gav û demê.

…
…

1). Selem bajarekî îdeal, welatekî xeyalî ye. Armanc ji Selemê Hezretê Muhemmed e, ji dostên Selemê jî sehabîyên kîram in.
2). Kazime Navekî din yê Medîneya Munewere ye.
3). ”Îdem” navê çîyakî nêzîkî Medîneyê ye.

-----------------------------------

Nivîskar: ABDULKADIR BÎNGOL abdulkadirbingol@gmail.com
Weşandin: 2011-06-01
Xwendin: 7869