Nefel

[ ŞEMÎ, 2024-12-21 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Kurdistaneka wekî Îsraîlê belakir ava dibe

HEWLÊR, 6/9 2014 — Musîbetek ji sed nesîhetan çêtir e. Musîbeta DAIŞ-ê û êrişên wê yên li ser Kurdistanê hem ji bo miletê kurd û hem jî ji bo Emerîkayê, Ewropayê û cîhana azad ji sed nesîhetan çêtir bû.

Kurdistan îro bûye serê rima şerê li dijî DAIŞ-ê û rêya biserketinê tenê ew e ko Kurdistan jî wekî Îsraîlê bibe dewleteka belakir da ti hêz û ti dewlet nekarin û newêrin belaya xwe lêbidin.

Biryara Yekîtiya Ewropayê ko welatên endamên xwe di dan û firotina sîlehan de bo Kurdistanê serbest û teşwîq kir biryareka tarîxî bû. Rêya arîkariya eskerî ya belaş û firotina sîlehan bo Kurdistanê heta hetayê vebû. Biryara serokê Emerîkayê Barack Obama ko bi hêzên hewayî piştgiriya Kurdistanê bike û merkezeka koordînasyonê ya xurt li Kurdistanê ava bike biryareka tarîxî bû û hêdî Emerîka terka Kurdistanê nake.

Yanî hesabên wan hêz û dewletên ko vekirî yan jî bi dizî piştgiriya DAIŞ-ê dikin û dijminiya Kurdistanê û dewleteka kurdî ya serbixwe dikin ebediyen têkçûn. Hinek kes wisa dihesibînin ko êrişên DAIŞ-ê bersivek bû ji bo rêlibergirtina serxwebûna Kurdistanê û dibe ko hêvî duayên hinek dewletên cîran jî wisa bûn. Lê belê di pratîkê de bingehê avakirina dewleteka serbixwe ya kurdî nû hat danîn.

Kurdistana ko ji aliyê aborî ve bi firotina petrola xwe gaveka mezin ber bi serxwebûna aborî ve avêt, bi êrişên DAIŞ-ê xuya bû ko di warê parastina ewlekariya axa wê de kêmasî hebûn û rûbirûya hinek surprîzên negatîv bû.

Kurdistan mecbûr e ko ordiyeka neteweyî ya rêkûpêk ava bike. Kurdistan mecbûr e ko tesfiyeyeka mezin di teşkîlata hêzên pêşmergeyan de bike û wezareta pêşmergeyan ji nû ve organîze bike. Kurdistan mecbûr e ko ji îro pê ve beşeka mezin ji butçeya xwe li çekdarkirina pêşmergeyan û kirîna sîlehên modern serf bike.

Her ji niho ve agirî girtiye delinga hikûmeta Bexdayê û heta jê têt rê li ber hatina sîlehên pêşketî bo Kurdistanê digire. Kurdistan û mitefiqên wê dê rêyên anîna sîlehan bo Kurdistanê bibînin. Her ji niho ve agirî girtiye delinga Tirkiyeyê û bi guman li biryara Natoyê ya çekdarkirina Iraqê û Kurdistanê temaşa dike û ditirse ko hêdî nekare dîrekt bi rêya ordiya xwe yan jî endîrekt bi rêya PKK-ê şerê Kurdistanê bike yan jî tehdîdên eskerî li Kurdistanê bike.

Her ji ber hindê ye ko hevserokê HDP-ê Selahattin Demirtaş dibêje Ewropa sîlehan dide Kurdistanê bila Tirkiye jî sîlehan bide PKK-ya çekdar ya ko dê li Tirkiyeyê nemîne lê belê li başûrê Kurdistanê şerî bike. Her ji ber hindê ye ko agirî girtiye delinga hevserokê KCK-ê Cemîl Bayik û ji rojnameyên elmanî û tirkî re dibêje bila dinya sîlehan nede pêşmergeyan û bide PKK-ê.

Îrana ko li dijî dewleteka kurdî ya serbixwe ye ji ber ko sed caran ji dewleta tirkan aqiltir û stratejîsttir e her di roja yekê ya êrişên DAIŞ-ê de bi înisiyatîva xwe xwest sîlehan bide Kurdistanê û li hawara kurdan bêt da kontrola xwe ya li Iraqa şîî bigihîne heta Zaxoyê. Lê belê wekî me gotî musîbetek ji sed nesîhetan çêtir e û bi hatina Emerîkayê û Ewropayê hesabên Îranê jî serûbin bûn.

Heger em behsa Tirkiyeyê bikin ya ko di vê konstellasyonê de herî zêde xusirî Tirkiye bû. Tirkiyeyê têkiliyeka aborî û kulturî ya xurt digel Kurdistanê hebû. Heta gelek caran berpirsên Kurdistanê û Tirkiyeyê behsa "tifaqeka stratjîk" jî dikirin. Lê belê bi êrişên DAIŞ-ê diyar bû ko Tirkiye dewleteka firsetçî ye û ne ya rojên teng e.

Tirkiyeyê bi hêceta ko hinek êxsîrên wê di destê DAIŞ-ê de ne nexwest arîkariya eskerî bide Kurdistanê. Tirkiye dikare wê argumana xwe ji zarokên kolaneyên Enqereyê re bibêje. Gumaneka cidî li ser Tirkiyeyê heye ko arîkariya DAIŞ-ê dike û tixûbê xwe yê digel Sûriyeyê ji hatinûçûna DAIŞ-ê re vekiriye. Gelek medyayên emerîkî û ewropî raporên berfireh li ser vê piştgiriya Tirkiyeyê belav dikin. Niho hem Emerîka û hem jî Brîtanya û Ewropa preseka mezin li Tirkiyeyê dikin da tixûbê xwe kontrol bike û rê nede DAIŞ-ê.

Wezîrê derve yê Fransayê, Elmanyayê, Kanadayê, Norweçê, Swêdê, Îranê û gelek welatên dî hatin Kurdistanê û hem piştgiriya xwe ya însanî û hem jî piştgiriya xwe ya eskerî ji bo şerê li dijî DAIŞ-ê nîşan dan. Tirkiyeya ko cîran e û wekî kurdan sunî ye jî û tew xwe dost jî dizane bêdeng ma. Me ne Davutoglu û ne jî Erdogan li Kurdistanê dît.

Heyî û neyî di destê Tirkiyeyê de cardî PKK maye. Hemî medyaya tirkan li ser esasê derewan lêdixibite wisa nîşan bide ko li Kurdistanê tenê PKK şerê DAIŞ-ê dike. Li seraserê tixûbê Kurdistanê û dewleta terorîst DAIŞ-ê ko 1050 km ye 150 hezar pêşmerge di cepheya şerî de ne. PKK-ê bi navê YPG-ê li serê çiyayê Şingalê 20-30 gerîla hene û li kampa Mexmûrê jî hinek kesên çekdar ko tenê kampa vala ya Mexmûrê diparêzin hene. Bêyî ko îhtiyac pê hebe YNK-ê hinek gerîlayên PKK-ê birine devera Kerkûkê. Li van cihan yekê jî gerîlayên PKK-ê ne di cepheya şerî de ne.

Pêşmergeyên Kurdistanê kêmasiyên xwe yên ko di destpêka şerê digel DAIŞ-ê de çêbûn zû telafî kir û niho pêşmerge di pozîsyona êrişkirinê de ne. Pêşmerge heroj gund û nehiyeyên nû rizgar dikin û derbeyên kujende li terorîstên DAIŞ-ê didin.

Ji aliyê jeopolîtîk ve ji bo miletê kurd devereka herî giring Şingal, çiyayê Şingalê û gund û nehiyeyên li bakurê çiyayê Şingalê ne. Divêt pêşmergeyên Kurdistanê piştî rizgarkirina Zumarê hemî gund û deverên heta ko digihîn çiyayê Şingalê ji destê DAIŞ-ê derxin da bikarin xwe bigihînin çiyayê Şingalê û pêwistî bi derbasbûna ji aliyê Kurdistana Sûriyeyê ve nemîne.

Çiyayê Şingalê nuqteyeka esasî ya parstina bajarê Şingalê û parastina Kurdistanê ji erebên Iraqê û erebên Sûriyeyê ye.

Siyaseta ewlekariyê ya Kurdistanê divêt hêdî ne ew be ko tenê li ser tixûbê xwe xwe biparêze. Divêt Kurdistan bikare 30-40 km li dûrî tixûbê xwe midaxeleyî hemî êrişên mihtemel yên dijminên Kurdistanê bike û nehêle ew xwe nêzîkî Kurdistanê jî bikin.

Lewra divêt Kurdistan jî hêdî wekî Îsraîlê ji aliyê ewlekariyê ve bibe "dewleteka belakir" û hertim çavên dijminên xwe bitirsîne da ew cesaret nekin ko xwe nêzîkî axa Kurdistanê bikin yan fikra êrişkirina Kurdistanê di serê wan de çêbe.

Ji aliyê nêvdewletî ve bingehê damezirandina "kurdistaneka belakir" hat ava kirin. Emerîka li pişt Kurdistanê ye. Hemî Yekîtiya Ewropayê li pişt Kurdistanê ye, Kanada û hinek welatên erebî jî li pişt Kurdistanê ne. Miletê kurd fêm kir ko cîhana azad li pişt Kurdistaneka wisa ye ko bikare xwe li hemberî hemî rengên êrişan biparêze.

Roj baş cîranên Kurdistanê yên belakir! Ji îro û pê ve Kurdistan jî dê wekî we belakir be.

-----------------------------------

Nivîskar: ARIF ZÊREVAN zerevan@nefel.com
Weşandin: 2014-09-06
Xwendin: 17891