STOCKHOLM, 21/7 2008 — Duhî kongreya DTPyê ya duduyan çêbû û Ahmet Turk careke dinê bû serokê partiyê û him jî bi sitendina rayên hemû nûneran. Bijî! Ev tê wê maneyê ko ji Ahmet Turkî çêtir kes pêde nabe, tiştekî xêrê tune ye, lê dîsa jî em bibêjin bila li ser xêrê be.
Ahmet Turk him hevwelatî û hemşehriyê min e û him jî di wexta xwe de em – wek eşîr – mitefîqên hevdu bûn. Wek şexs jî nasiyeke me ya pir piçûk heye.
Xweda heye ko mala Hecî Sînan di mintîqeyê de malekê milahîm, ciwanmêr û nandar e. Di vê malê de yê ko kurdçî Evdilhelîmê rehmetî bû, yanî bavê Ferhan Turkî bû.
Ahmet Turk di DTPyê de yan jî di partiyeke dinê de be – ji bo ew bibe parlamenter – ferq nake, loma jî kes nikare bibêje ko Ahmet Turk ji bo parlamenteriyê di vê partiyê de ye. Potansiyela mala Hecî Sînan û nemaze ya Ahmet Turkî bi xwe jî li mintîqeya Mêrdînê têra xwe heye.
Ez di wê baweriyê de me ko ew bi serê xwe be, yan jî di partiyeke ji rêzê de be jî bi rehetî kare bibe parlamenter.
Ji hêla madî de jî tu îhtiyaca wî ji tiştekî tune ye. Têra xwe erdên wan û milkên wan hene…
Piştî van agahdariyên di derbarê Ahmet Turkî de êdî divêt mirov li ser fikir û helwêstên wî jî du gotinan bibêje ko bê ew çima di serokatiya vê (DTP) partiyê de weha mîna hêlkanê kil dibe û gah dihere û gah tê.
Ji hêla fikrî de ez ê xwe bispêrim gotinên dostekî ko Ahmet Turkî baş nas dike û bi hev re siyaset kirine. Wî dostî digot ko li gotinên Ahmet Turkî yên pêşî guhdarî bikin û baweriyê pê bînin, ji ber ko ew ên wî nin, jê pê ve wî çi got jê bawer nakin, ji ber êdî ew ne yên wî nin û baweriyê pê nînin.
Min bi xwe nedît, lê hevalên ko di heman organan de bi wî re xebitî bûn, ev tesbîta wî dostî tesdîq dikir ko di civînên partiyê de wî gelek caran li gora fikrên xwe helwêst daneniye. Yek ji wan civînên DEPê jî meseleya helwêsta di derbarê “Hêza Çakûçî” de bû ko biryara partiyê bêt eşkerekirin bê bila ev hêz bîmîne, yan na? Gava fikrên li ser mayin û nemayina “Hêza Çakûçî” ya ko wê demê li başûrê Kurdistanê bicîhbûyî tê minaqeşekirin, Ahmet Turk pir bi eşkereyî li gel mayinê wê fikra xwe beyan dike, lê gava tê dengdayinê ew li dijî fikir û nêrînên xwe raya xwe bi kar tîne, yanî ew dibêje ko bila biryara DEPê ew be ko ev hêza hanê ji axa Kurdistanê bar bike. Her çi qasî kesî li wan guhdarî nekiribe jî helwêsta DEPê weha bû ko ew hêz li Kurdistanê nemîne ko wê kurd diparastin û ev destketiyên îroj jî berdewamiya wan rojan e.
Di netîceya wê civînê de helwêst û biryara DEPê ya resmî derketina “Hêza Çakûçî” bû û ev ji raya giştî re hat eşkerekirin.
Îcar gava ko hin dost daweyê li Ahmet Turkî dikin bê wî çima raya xwe li dijî fikrên xwe bikar aniye, ew weha dibêje: “Ez naxwazim ji bo rayekê bi îxanetê bêm îthamkirin”.
Ji hêla fikirî de wî dengê wîcdanê xwe îfade kiriye, lê di dengdayinê de wîcdan/mîcdanî pere nakiriye. Loma jî ez ji wê rojê û vir de hertim li gotinê wî yên pêşî guhdar dikim û li gora xwe di derheqê fikrên wî de digihêjim qeneetekê. Bi rastî jî gava ew dest bi axaftinê dike, her di destpêkê de hêlên wî yên kurdewarî bi pêş de ne, lê gava bi nav de dihere, êdî hin gotinan dike ko ne telefuza wî û ne jî tirkiya wî têrê dike ko mirov dizane ew ne fikrên wî ne; yan jî min xwe weha îqna kiriye. De ka hûn jî ji kerema xwe re ji niha û pê ve piçekî bi dîqet lê guhdarî bikin.
Ez weha bawer dikim ko Ahmet Turk bi fikir, perspektîf û îradeya xwe hereket bike, yan jî firset hebe ko ew bi mejî û helwêsteke azad di vê qadê de siyasetê bike, dê fêdeya wî hebe û ew ê potansiyela li derûdora partiya wî karekterekî kurdewarî werbigire, lê bi vê şêla xwe, ew ê her bêşêl be.
Êdî em nikarin çûyin û hatinên wî bijmêrin bê ev cara çendan e ko dibe serokê berdewamiya vê (DTP) patiyê.
Bi salan e ko em li heman çîrok û kilamê guhdar dikin. Her ji çendeyekî carekê gotineke nuh û nalyonî dixin devê Ahmet Turkê reben û – xwedêgiravî – bi navê nuhbûnê kinc û ”tiraşa” wî diguherin û li ser wê kursiyê datînin. Heyfa mêran!
Heger devê min bigeriyaya min ê du gotin ji bo Ahmet Turkî bigotana, lê ji ber ko ez qîmetê didim nav û dengê wî û malbata wî, ez wê yekê nakim, lê dibêjim ko Ahmet Turk tiştên jê bawer nake dibêje û dike û ew ê bike.
Ew ê di vê dewreya serokatiya wî de jî heman tiştan bibêje û tiştekî bê guhertin tune ye. Û em nizanin bê ew ê careke dinê kenî Ahmet Turk ji serokatiya vê partiyê bê bidûrxistin û bi çi bê îthamkirin. |
