Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Gelo Kulturnameyê ji ber çi nivîsa Arif Zêrevanî sansur kir?

STOCKHOLM, 25/9 2008 — Kulturname malpereke nuh e ko ji terefê du dostên nêzîk ve berî bi demekê dest bi weşana xwe kiriye. Min li beşên wê nêrî, lê min endamên redaksiyonê nedît. Dema ko Newzad û Sidqî Hirorî dev ji Nefelê berda, wan diyar kiribû ko ew ê bi hev re vê malperê vekin. Bi qandî ez zanim jî ew herdu vê malperê bi rê ve dibin.

Ev herdu Hirorî jî dostên min in. Gava wan dev ji Nefelê berda jî ez gelekî li ber ketim. Yek jê çûyina du dostan ji bo min valahiyek bû û ya din jî Nefel di demeke xerab de bû ko gelek êrîş jê re dihatin –yek ji wan sedemên êrîşan jî nivîseke Newzad Hirorî bû– ko wan Nefel bi tenê hişt. Lê sedem çi dibe bila bibe, wan tercîha xwe kir û vê gavê malperekê bi rê ve dibin. Ez ji dil û can dixwazin ko ew bi ser kevin. Mirov tu carî naxwaze ko dostên mirovî bihilkumin û xwediyê helwêstên xerab bin.

Helbet mijara meseleya me tiştekî din e.

Arif Zêrevanî nivîsek di derbarê kitêba Ingmar Karlssonî de nivîsî û di Nefelê de belav kir. Malpera Kulturnameyê jî ew nivîs neqlî malpera xwe kir. Neqil kir, lê herdu paragrafên nivîsê yên dawiyê neweşand. Herdu paragrafên ko di nivîsa Arifî ya di Nefelê de heye û di versiyona Kuturnameyê de tune ye, weha ye:

— Şûna ko em rexneyan li Ingmar Karlssonî bigirin divêt em berê tîrên xwe bidin xwe. Çima PKK û rêberê wê Abdullah Ocalan ji bo kurdên bakur xizmetkariya tirkan û tirkbûna di bin kirasê »komara demokratîk« û »wetendaşiya Tirkiyeyê« de dixwazin û dijminahiya başûrê Kurdistanê dikin? Divêt kurd berê vê pirsê ji xwe bikin.

— Û bo nimûne çima Kosret Resûl (YNK) yan jî Fazil Mîranî (PDK) tenê wekî şexs ji 25 milyon kurdên hemî parçeyên dî yên Kurdistanê pirtir qezencê ji pereyên petrola Kurdistanê dikin? Qezenca ko her şexsek ji wan ji serwet û samanê Kurdistanê dike ji ya hemî kurdên bakur zêdetir e û paşê jî dema ko kesekê wekî Ingmar Karlssonî bibêje kurd ne li hev in û siyaseteka wan ya hevbeş nîne hinek kes xwe aciz dikin.

Fikrên Arifî têkevin serê mirovî yan jî nekevinê, wî ji xwe re li gora bîr û baweriya xwe nivîsek nivîsiye.

Niha pirs ev e: Heger ev fikir nakevin serê we (Kuturname), hûn çima nivîsa Arifî di malpera xwe de belav dikin?

Heger beşek ji wê nivîsê bi dilê we be û beşên dinê ne bi dilê we bin, hûn çawa wî heqî di xwe de dibînin ko nivîseke nivîskarekî weha ”bazko” bikin?

Ev tiştekî ne qebûlbar e û ne li gora tu prensîpên rojnamevaniyê ye.

Heger we nûçeyek li ser wê nivîsê belav kiribûya û we hin beşên wê wergirtibûna – heta bi deverekê – mirovî dikarîbû hûn fahm bikirana, lê we nivîs wek nivîsa kolumnê (quncikê) û teva wêneyê Arifî belav kiriye û we herdu beşên dawiyê sansur kiriye.

Dû re jî Sîrwan H. Berkoyî bi sernivîsa »Çawa Kulturname bû Sansurname« nivîsek di malpera Amûdê.net de belav kir û heta bi niha jî we deng ji xwe neaniye. Gelo ev ne ciyê pirsê ye ko hûn çima deng nakin?

Ez di vê merhaleyê de naxwazim şîroveyên zêde bikim û minaqaşeyeke dinê vekim, lê bi tenê dibêjim ev yeka hanê li bejna we nayê/nehat.

-----------------------------------

Nivîskar: ENWER KARAHAN enwerkarahan@hotmail.com
Weşandin: 2008-09-25
Xwendin: 7133