Nefel

[ YEKŞEM, 2024-12-22 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Mebesta min ne bêqîmetkirina Kawa Nemir bû

HELSINKÎ 18/7 2008 — Roja 16/7 2008-ê nivîsareke min ya rexneyî di Nefelê de hat weşandin. Nivîsa min komek rexneyan bû li rexneyên ko Kawa Nemir di hevpeyivîna xwe de li wergêrên kurd kirine.

Ji roja derketina nivîsarê ta îro nêzî deh nameyên tijî gilî û gazin ji xwendevanan li min barîne. Hin xwendevan gelek bi sernavê nivîsarê aciz bûne. Ji hin nameyan dixwiye ko piştî xwendina sernavê nivîsê, êdî xwendevan xwe naveroka nivîsarê negirtiye û bala xwe nedaye nivîsarê bi xwe lê li sernavê wê asê bûye û qehiriye.

Sernavê nivîsa min di Nefelê de wiha ye: “Kawa Nemir difinqulûz e û ji binê piyê xwe diaxive”. Guman tê de nîne ko ev sernavek provokatîv e. Herwiha ji stîl û zimanê naveroka nivîsê bi xwe dûr e.

Min bi xwe nivîs bi sernavê “Rexne li Kawa Nemir – Wergerandina ji wergeran jî ji nebûnê çêtir e!” nivîsîbû û ew bi vî sernavî gihand du malperên kurdî Nefelê û bloga bi navê Xwejen ji ber ko van herdu malperan hevpeyivîna Kawa Nemir belav kiribû. Min xwest heman nivîsarê bigihînim Peyamnerê jî lê mixabin e-maila wan di malpera wan de nedît (belkî ez têr lê negeriyam).

Nefelê wisa minasib dît ko sernivîsa nivîsara min biguhore û bike ”Kawa Nemir difinqulûz e û ji binê piyê xwe diaxive”. Ji bilî sernavê nivîsarê, Nefelê nivîsa min bi temamî û weke xwe belav kiriye. Tek guherandina dî ya biçûk ew e ko min di nivîsara xwe de hokera gihîner weke ”ku” nivîsîbû lê Nefelê ew kiriye ”ko”. Lê derdê min li vir ne ev hoker e, sernavê nivîsarê ye.

Dibe ko Kawa Nemir û hinek xwendevan bi vî sernavî êşiyabin. Hêvîdar im ko ew naveroka nivîsara min bi temamî bixwînin û bibînin ko erê min rexne li Kawa Nemir kirine lê ti tiştê di rexneyên min de ne bi armanca rûmetşkandina wî yan kesekî dî ye. Di sernavê nivîsarê de peyva ”difinqulûz” û ”ji binê piyê xwe diaxive” ji alî malperê ve hatine bi kar anîn.

Lê şiklê difina (poza, kepiya, lûta) Kawa qet ne mijara nivîsara min e û ne jî bi ti awayî ji min re ne giring e yan derd e. Ya rasttir, min kek Kawa ti car zindî nedîtiye û ta ji wêneyan jî baş lê nenêriiye ka difina wî çawan e. Çawan be jî, ne xem û xeyala min e.

Min bi ti awayî di nivîsara xwe de gotinên Kawa bêqîmet nekirine tevî ko min bi dijwarî rexne li nerînên wî girtine jî. Ya rast, min ji rexneyan zêdetir di nivîsarê de pesnê Kawa daye. Dixwazim wan gotinên erênî û pozîtîv yên ko min di nivîsara xwe de derbarê wî de gotine li vir rêz bikim da ko xwendevan hê zelaltir bibînin ko nivîsara min ne bi armanca heqaretkirina li Kawa yan ti kesekî dî hatiye nivîsîn:

”Helbestvan û wergêrê hêja Kawa Nemir...”

”Giring e ko her nivîskar û bi taybetî her wergêrê kurd wê [hevpeyivîna Kawa] bixwîne...”

”Nirxek mezin didim kek Kawayê zîrek û jêhatî. Li ser giringiya wergerandinê ez bi birêz Kawa re hevbîr im.”

“Ez ji mêj ve dizanim ko kekê me Kawa Nemir bi wergerandinê ve mijûl e û ez wî yek ji baştirîn wergêrên kurd dihesibînim.”

“Kek Kawa xemxwerek ziman û wêjeya kurdî ye. Ew jî xemgîn e ji ber ko kurd giringiyê nadin wergerandinê û wêjeya bilind. Ez di vî warê de hevbîrî wî me.”

Ev gotin û hemû şewazê nerm yê nivîsara min diyar dikin ko mebesta min bi rexnekirina gotinên Kawa Nemir qet ne bêqîmetkirina wî ye. Nivîsara min bi saya gotinên kek Kawa peyda bû. Mijara ko ew li ser peyivî bo min gelek giring e loma gotinên wî ez teşwîqî nivîsîna nerînên xwe û diyarkirina nirxê wergerandinê û wergêran kirim.

Herçi naveroka nivîsarê ye, ez dîsan ji hemû gotinên xwe yên tê de berpirsiyar im û amade me bersiva xwendevanan bidim eger pirs, pêşniyar yan gilî û gazinên wan li ser naveroka nivîsara min hebin.

***

Têbîniya Nefelê: Husein Muhemmed ji îro û pê ve dê wekî kolumnîst di Nefelê de binivîsîne û em jê re dibêjin tu bi xêr hatî nêv refên Nefelê.

-----------------------------------

Nivîskar: HUSEIN MUHAMMED
Weşandin: 2008-07-18
Xwendin: 5862